UGilbert Zulu owafundela ukukanika izimota utshona ebhoda eHarare ethwele amaqanda athengiswayo. Kwesinye isikhathi ayabola elokhu ezama ukuwathengisa njalo kenelisi ukuthola imali yokubuyela endlini elokitshini leBudiriro.
Uphila kabuhlungu uGilbert njengabanye abasakhulayo abangakaze bethole imisebenzi selokhu baphutsha izifundo zabo emakolitshini emfundo yaphezulu.
Ukuhlupheka kuka Gilbert kuvezwa yizicathulo zakhe esezisubuke okumangalisayo njalo esezitsheke okokuthi ulakho ukudonseka imsipha, okungenza ukuthi aqhuzuke inyawo.
Ujuluka izithukuthuku ebusweni, emhlane lentanyeni ngenxa yokusindwa ngamaqanda awafake ezitsheni ezimbili.
Ngosuku lolu uvuke ngovivi wahamba ngenyawo esuka eBudiriro waze wayafika enzikini yedolobho leHarare.
Kukhanya kusala ngalolusuku ngoba usethengise amathathu kuphela phakathi kwamaqanda afika phose amatshumi ayisikhombisa.Seligwaze umhlaba kodwa kalathemba lokuthi uzathola yona eyokugada umtshova esebuyela endlini. Kukhanya ngenyawo njengenhlalayenza.
"Lobanje ngafundela ukulungisa izimota angikaze ngisebenze empilweni yami. tNgithengisa amaqanda nsukuzonke kodwa imali engiyitholayo kayifiki iUS$3 yona okumele yenelise ukunginika idollar yomtshova,” kutsho uGilbert.
Wesaba ukuba amaqanda la azabola kungedlula insuka ezintathu elokhu ewathengisa. Banengi abafundele okutshiyeneyo abakusimo esifana lesika Gilbert.
UNomqhele Tshuma owafundela ukweluka inwele eHarare Polytechnic uthi, "Lobanje siluka abantu okwalonyaka kunzima. Uyathola ukuthi mina ngile ngane eyodwa efuna ukusiya esikolo sabantwana, imali yakhona iphelela kulesosikolo angenelisi ukuba ngihlanganise imali eyenela ukuthenga okubambekayo.”
Useleminyaka emihlanu eseluka abantu inwele kodwa engatholi inzuzo eyeneleyo. Abanye abenza umsebenzi ofanayo bathi kunzima kakhulu ukuphanda impilo elizweni.
UDumisani Mthombeni osebenzela e Copa Cabana laye ufana ledlozi elingabuyiswanga ngoba kwesinye isikhathi ucina ezulazula emcabangweni edingisisa ukuba kuyini okwamenza waba kusimo lesi. Uthi imithelo kahulumende yengeza inhlupho ahlangana lazo empilweni.
"Thina abagelayo udubo esisiba lalo ngolwemithelo kahulumende. Imali esiyitholayo ibhadala abanikazi bemiduli esisebenza kiyo. Imithelo leyi izakwenza impilo yethu ibenzima ngamandla.”
Bayakhala abanye bakhe abafisa ukuba uhulumende asekele imsebenzi yabo yezandla. UHenry Shoko ohlala elokitshini leMufakose laye uyakukhuthaza lokhu.
"Sifuna ukuthi uhulumende ngabe uyabeka isikhwama sokuthuthukisa abatsha ikakhulu sikhangela ukuba impilo zethu zahle zaphosa zavaleka ngenxa ye Covid-19.”
Uhulumende uthi usebenza lamabhanga agoqela eleFirst Capital Bank ekuqhubeni inhlelo zabatsha.
Kodwa abatsha abanengi bathi kabazifinyeleli inhlelo zabo ngoba akukhanyi ukuba kwenzakalani emabhanga okuthiwa kumele abancede ekusunguleni lekuthuthukiseni amabhizimusi.
UMnu. Zivanai Gumbo, okuhlangothi lukahulumende olubona ngezabatsha, uthi kunengi abakwenzela abatsha eZimbabwe.
"Uhulumende uzama ngazo zonke indlela ukuba wonke umuntu osakhulayo abe lakwenzayo. Kumele abatsha babhalise ku public service lapho bedinga imsebenzi ukuze bathole amathuba,” kutsho uGumbo.
UNkosiyethu Mlilo okunhlanganiso yeYouth People’s Actions uthi kaziqedakali inhlelo lezi.
“Uhulumende uyakhuluma amazwi nje kodwa eqinisweni inhlelo ezikhona azisizi abanengi. Ngabe kubekwa isikhwama sokusiza abatsha ngobunengi babo hatshi abalutshwane kuphela, ” kugcizelele uMlilo.
Inkampani yeStatista ebuthelela inani lemisebenzi, ezamabhizimusi lokunye emhlabeni wonke jikelele iveze kuphenyo elwenze nyakenye ukuba abasakhulayo eZimbabwe ababedinga umsebenzi abaleminyaka yokuzalwa esuka kwelitshumi lanhlanu – 15 kusiya kwengamatshumi amabili lane - 24 babeyisilinganiso sokwedlula kancane okulitshumi lambili ekhulwini - 12.37%.
Kodwa abahlolisisa umnotho bezimele bakuphikisa lokhu besithi laliphezulu kakhulu inani lababedinga umsebenzi ngalesos’ikhathi. Bathi akukhulumeki okwenzakal kulez’insuku.