Bathwelenzima abakhubazekileyo eVictoria Falls ngesikhathi isimo somnotho siqhubeka sisiba lukhuni, umkhathi womile, njalo lenhlelo zosizo zingekho.
Libalele, ligwaz'umhlaba edolobheni leli, lapha esihlangana labafelokazi abakhubazekileyo abalimela linjalo bezama ukuziphilisa ngemsebenzi yezandla.
Emsikeni weMoringa, sihlangana lomfelokazi uColleta Ncube weMfelandawonye, okhubazekileyo, njalo owondla umzukulu wakhe ngemva kokunyamalala kwendodana yakhe.
"Ngifike ekuseni ngama past 6, angikathengisi okufika idollar. Ukudla kasiholi, uyezwa kuthiwa kulabanye abaphiweyo, thina siyancitshwa."
Sixhumane njalo loNkosikazi Nyasha Manjazi, owafelwa ngumkakhe enyathelwa yindlovu ngomnyaka 2017. Ekhubazekile enjalo, kaphilanga emzimbeni.
“Kubuhlungu. Abanye bayakuhleka ngesimo okiso, njalo lebhizimusi kalihambi, emavinkilini intengo iphezuli, ngapho ngilabazukulu bokugcina.”
Abafelwa ngamakhosikazi abahlala edolobheni leli labo bathi kabalutholi usizo
lukahulumende. UMnumzana Walter Ndlovu, ophila ngokubambabamba uthi abakhubazekileyo kulumhlubulo weMatabeleland North baziwa ngokubandlululwa. Uthi inhlelo zeSocial Welfare kazifinyeleli kibo.
“Njengakithi eMat North balamanga, kasiholi. Bebethembisile ukuthi bayabuya lempuphu lezimali kabakho. Endlini siyabhadala i rent, esibhedlela akulakuthi ukhubazekile kumele uzithengele, kunzima kithi.”
UMnumzana Isaiah Chipepura, ozisebenzayo ekhubazekile, uthi badonsa nzima.
"Inyama lokuthi ngayicina nini angazi. Ngidla amathumbu, lenkukhu ekubolekeni sesize sibambana imphimbo ngokuboleka kungabhadalwa."
Banengi abakusimo lesi. UMnunzana Isaiah Chipepura olomkhuhlane wetshukela uthi kakho ehlelweni lweSocial Welfare.
“Asikakuboni, sizwa. Lohlelo luyaze lwedlule, khangela sesikuyiphi inyanga kodwa kwezinye indawo kuyaholwa.”
Udaba lokunganakekelwa kwabakhubazekileyo luke lwahlafunwa edale lephalamende ngeviki ephelileyo, kukhuthazwa uhulumende ukubaafukamele abahluphekileyo.
Kubuye njalo kwabalombuzo wokuba sekuhanjwe ibanga elifika ngaphi ngokuholiswa imali lokudla abantu bemadolobheni, umholi wezehlakalo zephalamande lezomthetho wakuleli, uMnumzana Ziyambi Ziyambi, wathi sebeqalisile ukuphathisa kwezinye indawo.
SEE ALSO:
Udaba Esilwethulelwe NguNokuthaba Dlamini