Amapholisa akwele Melika ahlolisisa amabhomba ambalwa athunyezelwe abake bakhokhela ilizwe leli uMnu. Barack Obama loMnu. Bill Clinton, usomabhizimusi uMnu. George Soros labanye abadlelana lebandla lama Democrats kanye lomsakazo weCable News Network (CNN).
Indawo lapho okuthunyezelwe khona amabhomba ...
Amapholisa awe Federal Bureau of Investigations (FBI) athi akulamuntu osebotshiwe okwamanje kusehlakalo lesi.
Aphinde athi akulamuntu obulewe ngamabhomba la abethunyezwa ngendlela ezitshiyeneyo.
UMongameli Donald Trump uthe lokhu akuvunyelwa elizweni leMelika. Kuthe sokusihlwa ngoLwesithathu wathi kumele amabandla wonke ehlise umoya ngodaba lolu njalo lokuthi imisakazo lamaphephandaba bethule indaba ezingaxabanisi abantu.
UMnu. Donald Trump
Abakubandla lama Democrats bathe kuyinhlamba ukuthi uTrump kazange akhuluma amagama abantu abathunyezelwe amabhomba la abagoqela uMnu. Obama loMnu. Clinton.
UMayor wedolobho leNew York, uMnu. Bill de Blasio, ukhuluma ngamabhomba elosibalukhulu weNew York, uMnu. Andrew Cuomo.
Kodwa-ke edale leCongress amalunga phose wonke akhulume lizwi linye esithi kubi kakhulu okwenziwe ngumuntu kumbe abantu abathumeze amabhomba la.
Nanku okwaziwayo ngamabhomba athunyezelwe abantu bonke laba:-
• Kutholakele iphakethe elilebhomba elithunyezelwe umkaClinton, uNkosikazi Hillary Clinton. Ngesikhatshana, kutholakale iphakethe elifanayo kuMnu. Obama.
• Iphakethe elinye ebelithunyezelwe owayeligqwetha lelilzwe leMelika, uMnu. Eric Holder, litholakale duzane lewofisi kaNkosazana Debbie Wasserman Schultz, omele iFlorida edalele Congress. Wake waba ngumngcinisihlalo wohlangothi lebandla lama Democrats eleDemocratic National Committee.
• Iphakethe litholakale emawofisini aweTime Warner Center eNew York lapho okusakazakhona iCNN. Iphakethe leli belilotshwe igama lika Mnu. John Brennan, owake wabangumkhokheli womapholisa ensitha aweCentral Intelligence Agency. UBrennan okwamanje uhluza izindaba kumabonakude weMSNBC.
• Ibhomba elelise New York likhutshwe ngamapholisa athole lilomlotha omhlotshana okungaziwayo ukuthi kuyini.
• Kulamanye njalo amaphakethe athunyezele usibalukhulu weNew York lomunye ongevezwanga igama okubandla lama Democrats osedale leCongress.
• NgoMvulo kwatholakala iphakethe elifanayo emzini kaMnu. George Soros, owaziwa ngokuphandela ibandla lama Democrats imalisikhathi sonke.
• UMqondisi weFBI uMnu. Christopher Wray uthi bahlolisisa ngesikhaphekhaphe udaba lolu.