Odokotela lokhe beqhubekela phambili bekhalala umsebenzi njalo bemba phansi besithi ababuyeli emsebenzini nxa izikhalazo zabo zingalungiswanga nguhulumende.
Isibhedlela seUnited Bulawayo Hospitals ngoLwesine sivale uhlangothi olwelapha izigulane ezivela phandle kwesibhedlla olwe Out Patients Department ngenxa yokuthi bekungela madokotela.
Odokotela abaphansi kwenhlanganiso yeZimbabwe Hospitals Doctors’ Association bethule umbiko othi ngoLwesihlanu bazatshengisela esibhedlela esise Harare eseParirenyatwa Hospital.
Udokotela Mxolisi Ngwenya, isikhulumi senhlanganiso yabodokotela laba eyeZimbabwe Hospitals Doctors Association (ZHDA) njalo engumsekeli womkhokheli wayo, uthe balokhe besemhlanganweni bexoxisana labammeli bakahulumende mayelana lezikhalazo zabo ethi angeke angeke aveza isibanga asebekiso okwamanje ngoba bengakaqedi inkulumo.
Laloba kunjalo, izigulane ezihambe esibhedlela seUBH ngoLwesine zithi ziphenduke zilokudana ngoba zingatholanga usizo kuOut Patients Department ebivaliwe.
Eyinye yama Out Patients Departments aseveliwe.
UNkosikazi Zithelo Sibanda uthe kuyadanisa ukuthi kabatholanga uncedo esibhedlela lesi.
Esinye njalo isigulane esixoxe leStudio 7 sithe umumo ezibhedlela mubi kakhulu ngoba abantu belokhe besiba lezikwelede zesibhedlela kodwa bengatholi ukwelatshwa besithi kungcono ukuthi bagulele ezindlini.
Abongi abakade bethembise ukukhalala umsebenzi kabakakwenzi lokhu.
Umongikazi, okhethe ukubizwa ngegame lokuthi nguTabeth, uthe bayesaba ukuxotshwa umsebenzi ngoba abongi abagqiba izifundo abangela msebenzi banengi kakhulu njalo abathembi ukuthi uhulumende lo uzabalalela nxa sebekhalale umsebenzi.
Uhlangothi olufanayo esibhedlela seMpilo lolwe UBH behutshaya ngoba bekungela ngitsho labongi.
Odokotela abananza izigulane ngodokotela abakhulu abangavunyelwa ukukhalala umsebenzi kodwa abenelisi ukuthi banakekele wonke umuntu ogulayo.