IKhomithi yedale lephalamende ebona ngezempilakahle ithi isibhedlela seWilkins Hospital sesilungele ukuvimba ukumemetheka kwegcikwane leCoronavirus-COVID19.
Kodwa amalunga ale ikhomiti akhuthaza uhulumende ukuba abe lezibhedlela ezinengi ezinjengalesi endaweni ezitshiyeneyo zelizwe.
Lokhu kuphume lapho lolugatsha lusethekelela isibhedlela lesi.
Osebenza eWilkins Hospital utshengisa amalunga edale lephalamende akwenza eWilkins Hospital lapho okuhlolwa abantu abalemikhuhlane enjenge coronavirus. (Photo: Mlondolozi Ndlovu)
Amalunga ekhomithi le atshele intathelizindaba ngemva kokwethekelela lesis’ibhedlela ukuba ilizwe selikusibanga esiphezulu ekulungiseleleni ukuvimba ukuthelelwana komkhuhlane weCoronavirus.
Umgcinisihlalo wale ikhomithi, uNkosikazi Ruth Labode, uthi basuthisekile ngabakubone esibhedlela lesi.
Lokhu kusekelwe ngomele iPumula edale lephalamende, uNkosikazi Sichelesile Mahlangu, othi kukhanya sokulungiswe kahle esibhedlela lesi ukwenzela ukuphatha abantu abahlolwa igcikwane leli lalabo abalalo.
Okwenzakale eWilkins Hospital ngoLwesithathu obekulamalunga edale lephalamende. (Photo: Mlondolozi Ndlovu)
Ophethe uhlangothi lwezempilakahle kumanisiphala wedolobho leHarare, uDokotela Prosper Chonzi, uveze ukuba basesibangengi sokuthi kube lezibhedlela ezinjenge Wilkins ezigabeni zonke zelizwe.
Kodwa esinye isakhamuzi seHarare, esingathandanga ukuvezwa igama, sithi silokuthandabuza ukuthi uhulumende ngempela uselungele ukumelana leCoronavirus.
“Angiboni ukuthi silungiselele njengelizwe leZimbabwe. Asila ma mask lapha eZimbabwe, kumele athengwe phandle. Kasilayo leyo mali. Phezu kwalokho siyananzelela ukuba kulomuntu obalekileyo elalo umkhuhlane, kutsho akuvikelekanga.”
Amalunga ekhomithi le aphinde ethekelela esilindweni sendizamtshina eseRobert Mugabe International Airport lapho afumane ukuba ilizwe lifuna imali yaphandle kwelizwe ukuze lithenge eminye imitshina yokuhlola abantu lumkhuhlane ngesikhathi bengena elizweni.
Umkhuhlane weCoronavirus oqhamuke kwele China usubulele abantu abedlula inkulungwane ezine zabantu, abazinkulungwane ezedlula ikhulu lamatshumi amabili bafunyanwa belalo. Okwamanje lokhu usabalala emazweni athuthukileyo anjenge kwele Italy, eMelika lamanye. Kwele South Africa kulabantu abayisikhombisa asebefunyanwe belegcikwane leli.
Your browser doesn’t support HTML5
Udaba Olwethulwe NguMlondolozi Ndlovu