Ikhomishini ebona ngezokhetho eye Zimbabwe Electoral Commission (ZEC) ithi ukuhlolwa koluhlu lwababhalisela ukuthola ilungelo lokuvota olwe voters roll kuqale ngempelaviki kodwa inani labantu abakwenzayo lokhu libikwa liphansi kakhulu koBulawayo.
Laloba inani lelo liphansi, abanye abantu koBulawayo lelizweni lonke jikelele bamukele ngenjabulo inyathelo elithethwe ngabe ZEC lokuphuma lezinye indlela abantu abangahlola ngayo amabizo abo besebenzisa omakhalekhukwini kumbe ngokungena ebulenjini.
UDistrict Elections Officer weZEC, uNkosikazi Sithembiso Khuphe, uthi kusukela ngoMqgibelo uhlelo lolu luqala, inani labantu asebehlole amabizo abo lingaphezu kwenkulungwane ezintathu kuphela.
Wengeze esithi kulendlela yokuhlola ibizo usebenzisa umakhalekhukhwini. Nxa abantu behlulekile kumele baye lapho abeZEC abasebenzela khona.
UNkosikazi Martha Ndlovu, omunye obehlola igama lakhe kuluhlu lwe voters roll, uncome uhlelo lolu ethi luhamba kuhle njalo wenelisile ukuhlola lakumakhalekhukhwini.
UNkosikazi Khuphe uthe kwezinye izikhathi kulabantu abalakho ukufica amabizo abo engekho kubangelwa yikuthi inombolo zesithupha ziyabe zifana lezomunye kumbe zingatholwa yimitshina yabo kumbe njalo kuyilabo ababhalisa ngenyanga kaMabasa.
Ukuhlola amabizo kuqale mhlaka 19 kusiya ku29 Nkwenkwezi njalo uzulu ulakho ukubhalisela ukuvota kanye lokuguqula indawo yokuvotela ngasonalesi isikhathi.
Ukhetho lukhangelelwe ukubakhona phakathi kwenyanga kaNtulikazi loNcwabakazi njalo umongameli welizwe, uMongameli Emmerson Mnangagwa, uthi uzakwazisa ilizwe ukuthi luqhutshwa nini emavikini amabili alandelayo.