Uhlelo lokuhlatshwa kwabantu abagoqela ababalisi labafundisi ijekiseni yokuvikela umkhuhlane weCovid-19 oluqale ngoLwesine phansi kwehlandla lesibili luya phambili kodwa belokhu bebalutshwana abazinikela ukuhlatshwa.
Izolo kuhlatshwe abantu abangamakhulu phose amane, 395, kuphela.
Asebehlatshiwe elizweni lonke kusukela loluhlelo lusungulwa kumaviki amane edluleyo sebezinkulungwane ezingamakhulu amane, 40,000, okulinani liphansi kakhulu, ngokutsho kwengcwethi ezibona ngezempilakahle.
Uhlelo lokuhlaba ijekiseni yesibili labo abahlatshwe eyakuqala ngenyanga edluleyo abagoqela odokotela, abongi kanye lomsekeli kaMongameli njalo engumphathintambo wezempilakahle uMnu Constantino Chiwenga lalo ngoLwesine.
Okumangalisa abanengi yikuthi kungani uMongameli Emmerson Mnangagwa elokhe engakahlatshwa ijekiseni yakweleChina le lanxa ebethembise ukuthi uzahlatshwa ndawonye labaphathintambo bakahulumende wakhe.
UMfundisi Thandeko Zinti Mnkandla utshele iStudio 7 ukuthi lanxa abamasonto sebeqalile ukuhlatshwa, abanengi abalalwazi ngakho ngoba ngoba uhulumende ekhakhulumisani lozulu ngendlela ecacayo ngaloluhlelo.
Your browser doesn’t support HTML5
Ingxoxo loMfundisi Thandeko Zinti Mnkandla
Isikhulumeli sogatsha lwezempilakahle uMnu Donald Mujiri yena uthe uhlelo lokuhlatshwa kwabantu lolu luhamba kuhle njalo wathi abezempilakahle sebevuma ukuhlatshwa ngobunengi.