Abantu abansundu kwele Melika bathi babhekane lenkethabetshabi eyesabekayo okumele kulwiswane lakho lokhu sonke isikhathi njengoba kusobala ukuthi bazondwa nguhulumende kaMongameli Donald Trump.
Longumbono wabantu abansundu abangene umhlangano omkhulu eNorfolk State University eVirginia obuhlolisisa ukuphathwa kwabantu ababeyizigqili kwele Melika kusukela ngomnyaka ka1619 kuze kufike ababethunjwe kwele Angola.
Umbuthano lo ubuqoqwe likolitshi leli kanye lomsakazo kazulu oweVoice of America obulesihloko esithi ‘Africa to America: The Odssey of Slavery’.
Ubugqili babakhona kwele Melika okweminyaka eyedlula amakhulu amabili.
Akade bedlana ingqondo kumbuthano lo bathe kuzwisa usizi ukuthi abantu abansundu lokhu bebandlululwa kwele Melika.
Usikhwicamfundo Gloria J. Browne-Marshall, obona ngezemithetho eJohn Jay College, uthi kuqhubekela phambili ukubandlululwa kwabantu abansundu kwele Melika.
Uthi okwamanje kusobala ukuthi sokulabantu abanengi abakhonza ezokubandlululwa kweminye imihlobo, ikakhulu abantu abansundu.
“Kwaqala kudala ngesikhathi kulemithetho eyaziwa ngokuthi yiJim Crow eyayingeyokuncindezela abantu abansundu ngedlela ezitshiyeneyo ezigoqela imithelo ye-tax lokunye okutshiyeneyo okwakukhanya ukuthi ngokokuncindezela abantu ababeyizigqili. Loba kunjalo abantu baphumelela ekwenzeni abakufunayo.
“Kukhanya engani kulabanye abantu ababengafuni umuntu omnyama, uBarack Obama, ukuthi angene esikhundleni sikamongameli. Lokhu akumelanga kusibisele emuva.”
Lokhu kusekelwa yisikhwicamfundo, uAssociate Professor Robert Trent Vinson osekolitshini yeCollege of William and Mary ofundisa ezembali yabantu.
Uthi inkethabetshabi kwakuyindlela abamhlophe ababefuna ukubusa ngayo umhlaba wonke jikelele.
“Lokhu kwakungokomhlaba wonke, kwakungelamingcele ukubandlulula lokhu esilokhu sibhekane lakho. Silomongameli okwamanje okhuthaza inkethabetshabi. Uzonda abantu abamnyama, uzonga abadabuka kwele Mexico, uzonda abokholo lweMoslem. Konke lokhu kuphuma emlonyeni wakhe.”
UTerry Brown, uSuperintendent weFort Monroe National Monument, uthi kuyamangalisa ukuthi abantu abansundu lokhu bephila ngedlela abahlupheka ngayo.
“Kuyamangalisa ukuthi lokhu siphila. Sahlupheka kakhulu. Lakhathesi siyahlupheka. Le yimbali emangalisayo eyabantu.”
Uhulumende kaMongameli Trump okwamanje uyakuphikisa ukuthi ubandlulula abantu abansundu labanye abadabuka kwamanye amazwe. UTrump yena uthi kalankethabetshabi ngitsho lakancane.
Your browser doesn’t support HTML5
Udaba Esilethulelwe NguGibbs Dube