Ezinye izakhamizi zesigabeni senduna uGampu Sithole wesihlanu eTsholotsho lezinye indawo zithi seziphila ngokunatha itiye kuphela ngenxa yokuswelakala kokudla.
Abanye babo kabenelisi khona ukunatha itiye njalo kabatholi ukudla okuholiswa nguhulumende.
lzakhamizi lezi zithi zacina ukuthola ukudla okuholiswa nguhulumende ngoNkwenkwezi lonyaka loba kusaziwa ukuba kulendlala enkulu ebangelwe yisikhudumezi somkhathi ese-El Nino. Abanye babo bathi balensuku ezinhlanu bephila ngokunatha itiye ngoba akulakundla okuholiswa nguhulumende lenhlanganiso ezizimeleyo. UNkosikazi Jojina Moyo ngomunye wababhekane lendlala le esigabeni sika Gampu.
"Ngiyalamba mntanami, ungibona nginje ngilapha sengixathuka isikhumba njalo lamanzi asehlupha."
Esinye isakhamuzi esihlala endaweni le, uNkosikazi Girly Sithole, uthi uyalamba umdeni wakhe.
"Sesilala sivuka mntanami. Ungibona lapha sengilamalanga amahlanu ngingadli. Besesiphila ngetiye kodwa lakho sekunzima."
UNkosikazi Dorris Macele ohlala esigabeni senduna uNqoya laye ukhala ngokuswela ukudla.
"Indlala inengi mntanami, ngithola isaka elilebhakede, sicene ukuhola kunyanga leya edlule. Kwami siyisithupha kodwa kuhola abantu abathathu isizatho bathi bona benzela ukuthi abanye labo bathole ngakho kunzima vele akuseneli."
Kulabanye njalo abathi bayakuthola ukudla okuholiswa nguhulumende kodwa akweneli imuli zabo. UNkosikazi Ruth Tshabangu ohlala eNemane uthi kunzima lonyaka ngoba abantu kabalakudla ngenxa yesomiso esesabekayo.
"Mama indlala inzima kithi, siyahola kodwa akuseneli ngoba siholiswa ngemvaa kwenyangaa ezintathu nfakgo sikhala kuye uBaba ukuba asizamele siyalamba. Abanye abalingana lathi bayahola kodwa thina akulamali uhukumende asipha yona ngabe indlala inganeno."
Induna zisanda kunikwa umumbu lokunye nguhulumende phansi kohlelo lweIsiphala seNkosi. Induna uAshil Gampu Sithole lV uthi uhulumende kumele engeze ukudla lokhu ngoba banengi kakhulu abantu ababhekane lendlala lonyaka.
"Sicine sithole amathani angamatshumi amabili kodwa awayeneli, abantu abalambayo banengi ngakho sicela ukuba uhluumende angezelele ukuze wonke umuntu athole ukudla lobanje leSocial Welfare incedisa kodwa abantu abeneli."
UMongameli Emmeson Mnangagwa wathembisa ukuba akulamuntu eZimbabwe ozabulawa yindlala lonyaka. EleZimbabwe lidinga imali edlula kancane amabhiliyoni amathathu amadollar eMelika – 3.3 billion U.S. dollars eyokuthengela abalambayo ukudla. Inhlanganiso ezizimeleyo ezigoqela eyeWorld Food Program lezinye zithi zizama ngamandla wonke ukuba ziphandele ukudla abantu abalambayo eZimbabwe.
SEE ALSO:
Udaba Esilwethulelwe NguAnnahstacia Ndlovu