Abesifazane esigabeni sako Mvuthu, eHwange, bakhala ngendlala, ikakhulu ebantwaneni asebehamba esikolo belambile.
Amakhosikazi la athi akulanhlelo zenhlanganiso ezizimeleyo zokunika abantu ukudla njalo lohlangothi lukahulumende olweSocial Welfare kaluphathisi zonke izakhamizi. Omunye wabakhala ngendlala nguNkosikazi Shamiso Mpofu.
“Ikakhulu ebantwaneni besikolo kunzima kakhulu lakubomama ngoba sebeze bephila enye impilo ngendlela zokudinga imali engekho right bezifaka ku risk ngenxa yomumo okhona. ”
UNkosikazi Daina Maseko, oleminyaka yokuzalwa engamatshumi ayisikhombisa ohlala esigabeni seNdlovu, laye ukhala ngendlala.
“Abantwana bayahawula kakhulu besiyesikolo. Kumele behambe bedlile, bethwele imphako, kodwa konke lokho kabakutholi.”
UNkosikazi Maseko uthi indlala le isiphazamisa abantwana ezikolo.
“Indlala elapha sinkulu kakhulu. Sake sayibona ngo 2008, kodwa yayingcono kuleyakhathesi ngoba kasilamali, kasilani. Lenhlanyelo esasilazo kumbe sihola kazimili, layo imali kayikho.”
UNkosikazi Margaret Nyoni weBH23 laye uthi sokunzima ukondla abantwana ngenxa yendlala.
“Njalo uzathi usathi ulime ingadi, uzwa sesibizwa emhlanganweni, kodwa awusincedi ngalutho. Ngapha lekhaya kulendlala, lomntwana ufuna ukuya esikolo, kubuhlungu lokhu. Aluba uhulumende uyasihawukela. Khathesi saphiwa amabele okuyinunu bahamba bahawula, lemali yokuthi wondle abantwana kayikho, njalo konke lokho kumele sizibonele.”
Kunyangedluleyo izakhamizi lezi zithi zaholiswa ingcosana yomumbu ama-7,5 kilograms umuntu munye ngamunye, kodwa loluhlelo lwalungagoqeli zonke izakhamizi. Uhulumende uthi abantu abafika izigidi phose ezilitshumi – 9 million badinga ukudla ngenxa yendlala ebangelwe yisikhudumezi somkhathi ese-El Nino esenza kungani kahle izulu ngesikhathi sokulima amabele.
Kusenjalo, umphathintambo wohlangothi lwezemfundo, uMnumzana Torerayi Moyo, ubike ukuba kusukela kuviki ezayo, uhulumende uzabela izikolo ukudla okuzaphekelwa abafundi ngenhloso yokwehlisa izinga lephango elihlasela abafundi ezikolweni zonke zikahulumende.
UMoyo uthe baphiwa luhlangothi lwezokulima isilinganiso samathani afika phose inkulungwane - 900 tonnes. Kukhangelelwe ukuba bazaphekelwa nsukuzonke.