Abohlangothi oluqondisa ezemihloliso elizweni olweZimbabwe Schools Examination Council lwazise ngokukhuphulwa kwembadalo yokubhala imihloliso eyeOrdinary Level leAdvanced Level lugatsha.
Abazali abanengi bathwele imikhono emakhanda ngokuqansa kwentengo yokuloba imihloliso yesibangeni seOdinary Level leAdvanced Level. Abazali abanengi bathi bebesazama ukuhlawula imali yesikolo layo eyaqansa okungelamkhawulo sebephinda behlangana lale eyemihloliso.
Olwela amalungelo oluntu uMnu Effie Ncube laye usole kakhulu inyathela lokukhwezwa kwenhlawulo yemihloliso.
''Indaba yokuthi ZIMSEC ikhweze iexamination fee yinto embi kakhulu yikuthakatha abantwabethu. Kunje siphakathi kosizi olwesabekayo abantu abadala sebabhidliza ilizwe bona bafunda kungabhadalwa lutho befundiswa ngamakhiwa wonala alongcindezelo behamba mahala ezikolo behanjiswa ngamabandla ezokholo babuthelela amadegree lamhlanje ngaphansi kombuso wabo akulamntwana ozafunda ngaphandle kwababo abanothileyo ngakho indaba yokukhweza iexamination fee kayiphele abantwana abafunde kungela nhlawulo. Amanyala la ayenzakalayo akumelanga kwenzakale.''
UMbabhalane wezemfundo kuBulawayo Progressive Residents Association, uMnu Ben Ncube uthi bayadana ngenyathela leZIMSEC.
''Silubonile uhlelo olutsha lweexamination fee, uhulumende wayethembise ukuthi kazukukhweza ifees ezikolo, kanti lokhu usekwenzanjani ngoba kuyedlula ischool fees sikubona kungesinto eqondileyo njalo kaqali abauze ukuthi kuqondile sibona sekusemaphepheni abazali sekumele babhadale.''
Isakhamuzi sakoBulawayo, uMnu Thomas Sithole uthi ngempela liyadanisa inyathela labeZIMZEC elilakho ukubangela ukuba abanye abafundi behluleke ukubhala imihloliso lonyaka.
''Silokudana okumangalisayo ngoba besingakhangelelanga ukuthi iZIMEC ikhweze ngalindlela kuzabangela ukuba abanye abafundi bangenelisi ukubhala, ukubuyela muva kwezemvundo ngoba abazali abanengi abasebenzi ngeke benelise ukubhadala yonke imali le, uhulumende kangenele ehlize limali kulobunzima obukhulu ezweni besingakhangelelanga ukuthi iZIMSEC ingakhweza ngale indlela.''
Abenhlanganiso yababalisi eyeProgressive Teachers Union of Zimbabwe labo bayalisola inyathela leZimsec athi kuzakhama inengi lababalisi Kanye lezisebenzi zikahulumende ezileholo eliphansi kakhulu uma kuqathaniswa lokuqansa kwentengo yempahla ezithile ezweni kunye lezefundo.
Uhlangothi lwezemihloliso olweZimbabwe Schools Examinations Council (ZIMSEC) lwethule isaziso sokukhwezwa kwenhlawulo yokubhala imihloliso yesigaba seOrdinary Level isifundo esisodwa siqalela kukhulu lamatshumi ayisificamunwe munye amadola kusiya kumakhulu amane lamatshumi edlula amane-$190 kusiya ku$443 kuthi iAdvanced Level isifundo esisodwa siqala kumakhulu edlula amathathu lengxenye amadola kusiya kumakhulu amane lamatshumi edlula amathathu-$351 kusiya ku$432.
Your browser doesn’t support HTML5
Udaba lokukhuphulwa kwenhlawulo yokubhala imihloliso siluphiwa nguAnnahstacia Ndlovu