Abakubandla leZanu PF bathi kuqondile okwenziwa ngamanye amalunga ebandla leli afisa ukuba uMongameli Emmerson Mnangagwa eqhubeke esembusweni kungafika umnyaka ka2028.
Umnu. Joseph Tshuma omele iPelandaba Tshabalala edale lephalamende ekubandla leZanu PF uthi isinqumo esithethwe libandla leli emhlanganweni we-Annual National People’s Congress kobulawayo ngomgqibelo siveza ukuba abantu bakhululekile ukukhuluma abakufunayo ngenkokheli yabo.
Esethula isinqumo, ophethe uhlangothi lwezemithetho kubandla leli, uMnu. Patrick Chinamasa, watshela ababesemhlanganweni lo ukuba uMnangagwa yena usefisa ukuyaphumula emzini wakhe.
Isisekelo sombuso welizwe sikubeka sobala ukuba osesikhundleni sikamongameli kumele ahlale embusweni okweminyaka engamatshumi amabili engakhethwa kabili kukhetho.
Kungaguqulwa isisekelo sombuso welizwe, obesesikhundleni kavunyelwa ukuba ngumongameli uma esehlale embusweni okweminyaka elitshumi.
UTshuma utshele iStudio 7 ukuthi kulungile okwethulwe nguchinamasa lamanye amalunga ebandla elibusayo.
Sixoxe njalo ngodaba lolu loMnu. Solani Moyo okubandla leCitizens Coalition for Change.