Abantu abanengi eZimbabwe bathi bathwele nzima ngenxa yokukhuphuka kwentengo yempahla etshiyeneyo kanye lokuswelakala kwezulu.
Omunye wabakhala ngokwenzakale elizweni nguMnu. Paul Mpofu ohlala eMaphisa.
UMpofu uthi abantu baphila nzima emaphandleni lemadolobheni.
Uyakhala loNkosikazi Pretty Moyo ohlala esigabeni seJimila eTsholotsho.
UMnu. Thembelani Moyo ohlala eKwarai esigabeni seLupane laye uthi baphila nzima kulez’insuku.
Idollar leZimbabwe ligugudeka nsukuzonke loba uhulumende esithi uzama ngamandla ukuthi lingapheli amandla njengalokhu okwenzakala ngomnyaka ka2008.
EleZimbabwe lalahla idollar lelizwe kusukela ngomnyaka ka2009 laze laqala ukuyisebenzisa uMongameli Emmerson Mnangagwa engena esikhundleni.
Okwamanje amanye amabhizimusi kawasalamukeli idollar leZimbabwe besithi seliphele amandla okumangalisayo.
Idollar elinye lwakwele Melika lithenga amadollar eZimbabwe azinkulungwane ezilitshumi lane - ZW$14,000 emkambo wensitha kuthi ebhanga elikhulu lelizwe lithenga inkulungwane phose ezilitshumi zamadollar eZimbabwe - ZW$9,000.