Abaculi abadabuka kweleZimbabwe abathathu sebethule ingoma ezintathu ezixhwayisa uzulu ngegciwane leCoronavirus.
Enye yalezi ndlikizane kamabonakude wengoma yeCoronavirus ihlatshelwe ngumculi kaMaskandi olodumo, uSebenzani Mnqolo odume ngelithi Mehlokazulu.
Akahambi yedwake uMehlokazulu uphelekezelwa yimbongi yezimbongi uBongani Ncube.
UMajozi Qedakusemnandi uThando Ngwenya laye useyethule eyakhe ingoma esithi lumbuqazwe usuthethe umuntu wonke wamuthi tshoko ezindlini.
Umculi uMajozi Thando Ngwenya
Uthike usizi yikuthi lokhu sekubangele indlala lokuhlupheka okukhulu.
Kantike lomculi wetshovatshova iRhumba uNgqabutho Voko leqembu lakhe leNkayi Messengers labo sebehwatshe etshisayo eyeCovid-19 besithi Thixo Sithethelele.
UNgqabutho uthi bathe bexwayise njengoba sekungene inyoka endlini.
“Bengifuna ukubafaka ethembeni lokuthi konke okwenzakalayo ngaphansi kukaThixo kuzodlula. Okwethu esingakwenza asiqineni emthandazweni.”
UNgqabutho Voko umculi weqembu leNkayi Messengers
UMajozi laye ubethazwilinye.
“Kufanele sihlale ezindlini ukuze siphephe. Kungakhonje sicule lengoma ukuthi sihlale ezindlini. Siyafa ngokuhlalezindlini. Akuhlaleki ezindlini.”
Kanti uMehlokazulu uthi injongo esemqoka yikuthi umuntu wonke aphephe.
“Indaba yecoronavirus ikhona iyaphila. Abantu abalandele yonke imigomo abayitshelwa ngohulumeni ukuze sihlale siphephile.”
Bonke laba abaculi bathi thintana labo uzitholele ingoma zabo lezi ezizahlala zikukhumbuza ukuthi uzivikele kuleligciwane.