Babambe Owangaphansi Abantu Ngobukhohlakalo Ebenzakala eZimbabwe Okutshayelwa Esikhewini Imali Yokuthenga Imbuzi Lokunye

WASHINGTON —

Abantu abanengi babambe owangaphansi kulandela ukuvalelwa entilongweni kwabo somabhizimusi uMnu. Moses Mpofu loMnu. Mike Chimombe okucatshangelwa ukuba batshayela esikhewini izigidi ezedlula isikhombisa zamadollar eMelika – 7.3 million okwakumele isetshenziswe ekuthengeni imbuzi ezedlula ingxenye yekhulu ezabantu abaswelayo emaphandleni.

Ababili laba banikwa luhlangothi lwezokulima imali le ngomnyaka ka2021 kodwa bathenga imbuzi ezedlula kancane eziyinkulungwane ezine – 4,000 kuphela.

UMpofu loChimombe kwakumele bencedise uhulumende ekuqhubeni uhlelo lwePresidential Goat Pass-on Scheme.

Abachothoza lokhu bathi kunengi okwenziwa nguhulumende kaMongameli Emmerson Mnangagwa okuveza ubukhohlakalo obumangalisayo.

Ukuze sihlaziye udaba lolu, sixoxe loMnu. Kuda Munsaka okubandla leZanu PF loMnu. Fortune Mlalazi olandela ezombusazwe.

UMunsaka uthe ubukhohlakalo busemazweni atshiyeneyo hatshi eZimbabwe kuphela njalo ngamanga ukuba uMnangagwa wenza lokhu labanye abantu abacatshangelwa ukuthi batshaphaza imali kahulumende.

Kodwa uMlalazi uthe inhlanzi ibola kusukela ekhanda ngakho-ke uMnangagwa ungcole kakhulu kwezobukhohlakalo ngoba ulenotho enengi edlula imali ayihola hulumende.

SEE ALSO: