Abalandeli bebandla leZanu PF eZansi yedolobho leGwanda babikwa sebesethuselana njalo abanye sebebaleke emizini yabo ngemva kokuzwa ukuthi imizi yabo ingatshiswa.
Abasekeli baka Mnu. Abedinico Ncube, onguye ummeli weGwanda South edale lephalamende okwamanje, babikwa behlasela abalandeli baka Mnu. Omphile Marupi oseveze isifiso sokuncintisa laye kukhetho lwamaPrimary aweZanu PF.
UMarupi oncintisa kulolu khetho uthi abalandeli bakaNcube baphambili ekwethuseleni abantu ukuthi bangamsekeli.
UMarupi uthi usekhweze loludaba emapholiseni njalo omunye wabalandeli bakhe sebalekele umuzi ngoba esesabela ukutshiselwa endlini.
Umgcinisihlalo weZanu PF ezansi yeMaNdebeleni, uMnu. Rabelani Choeni, uthe loludaba alukafiki ezindlebeni zakhe.
Ibandla leZanu likhangelelwe ukuqhuba ukhetho lwama primaries ngeSonto njalo labancintisayo bahamba bekhankasa bendawonye.
Kulamalunga alelibandla afika phose ikhulu loba nje kulezihlalo ezifika phose amatshumi amabili ezedale lephalamende leSenate.
Imbiko etholwe yiStudio 7 iveza ukuba amakhosikazi uAlma Mkhwebu loRennie Kibi labo baphose badlephana ngesikhathi bekhankasa. Laba ngabanye abakhangelelwe ukuncintisana kukhetho lweSenate.
Amapholisa axwayisa uzulu elizweni jikelele ukuthi azabopha yiloba ngubani ozaphatheka kudlakela lwezombusazwe kukanti uMongameli Emmerson Mnangagwa laye uthembisa ukuthi uhulumende wenza imizamo yonke yokubona ukuqhutshwa kokhetho olulokuthula.
Your browser doesn’t support HTML5
Sebexokozela Okumangalisayo Abalandeli Bebandla leZanu PF