Olwesibili olwedluleyo lube lusuku oluhle kakhulu kwezemidlalo kwele Zimbabwe njengoba amaqembu amela ilizwe emidlalweni etshiyeneyo enqobile kumidlalo yawo.
Iqembu labesilisa elimela ilizwe emdlalweni kakhilikithi lona elaziwa kakhulu ngegama elithiwa Chevrons linqobe ele Sri Lanka ngama runs angamatshumi amabili lambili emdlalweni wesibili owohlobo lwe One Day International.
Limidlalo isentshenziswa yinhlanganiso ye International Cricket Council ukudinga amaqembu azakuyadlala kumncintiswano wezizwe zomhlaba ngomnyaka ka 2023 njalo ukaputeni weqembu le Zimbabwe uCraig Ervine uthi bajabule kakhulu ngokunqoba kwabo loba yena engasenelisanga ukufikisa ama runs alikhulu.
“Khona kuyadanisa ukuthi kusele kancane ukuthi ngitshaye ama runs alikhulu kodwa okuqakathekileyo yikuthola ama runs aphathise iqembu.
Sisebenze kanzima ukuthi siwathole ama runs kodwa kusiphathisile ukuthi uRegis uqale kuhle okwenze kwaba lula kimi lo Sean njalo sonke nje esitshaye ibhola sidlale kakuhle okokuthi akumangalisi kumdlalo wesithathu esiba khona omunye wethu ozatshaya ama runs alikhulu,” kutsho uErvine.
UErvine ukhitshwe esetshaye ama runs angamatshumi ayithoba munwe munye lanye (91).
Iqembu le Zimbabwe lithole imiklomelo elitshumi ngokunqoba elikwenze ngoLwesibili njalo lawa maqembu azadibana njalo ngoLwesihlanu emdlalweni wesithathu wona ozehlukanisa elinqobileyo lelinqotshiweyo njengoba kumdlalo wakuqala ele Sri Lanka linqobe nge 5 wickets.
Kusenjalo, iqembu labesilisa elimela ilizwe emdlalweni wenguqu elaziwa kakhulu ngegama elithiwa Warriors limangalise abalandeli bomdlalo wenguqu ngokunqoba elikwenze ele Guinea nge 2 ka 1 emdlalweni walo owokucina owesibaya sika Group B kumncintiswano we Africa Cup Of Nations oqhutshelwa elizweni lase Cameroon.
Ocubungula ezemidlalo uWashington Sibanda uthi iqembu le Zimbabwe belingeke liphange liphelelwe ngumphako ngabe abaqeqetshi bebekhetha kuhle abadlali.
“Mina ngokubona kwami ngibona angani umqeqetshi obethungamela leliqembu uNorman Mapeza bekufanele ayenze ngcono ikakhulu kubadlali esibabone bedlala emdlalweni leqembu le Guinea abajengo Kuda Mahachi kanye lo (Jordan) Zemura.
Laba ngabadlali abalohlonzi njalo abagijimayo okokuthi ngabe baphiwa ithuba kumidlalo yakuqala aluba senza ngcono,” kutsho uSibanda.
Iqembu le Zimbabwe liphutshe imidlalo yalo lihlezi emsileni wengalane yesibaya sika Group B lilemiklomelo emithathu ngemva kokuba linqotshwe nge 1 ka nya ngele Senegal emdlalweni walo wakuqala kwathi kowesibili linqotshwe nge 2 ka 1 ngele Malawi.
Kolunye udaba olumayelana leqembu elimela ilizwe le Zimbabwe kwezemidlalo iqembu labesifazane elimela ilizwe emdlalweni we hockey linqobe ele Uganda nge 5 ka nya emdlalweni walo wesibili kumncintiswano we Africa Cup of Nations oqhutshelwa elizweni lase Ghana.
Emdlalweni walo wakuqala iqembu le Zimbabwe linqotshwe nge 3 ka nya ngele South Africa.
Iqembu le Zimbabwe likusibaya sika Pool A ndawonye le South Africa, Namibia, kanye le Uganda.
Kusibaya sika Pool B kule Zambia, Nigeria, Kenya kanye le Ghana.