Izakhamizi zakoBulawayo zithi zithwele nzima ngokudinga impuphu engasatholakali ezitolo.
Lokhu kwenzakala ngemva kokuba uhulumende ethe uzaqhubekela phambili ebhadalela ingxenye yendleko yokuthenga umumbu.
Isaka lempuphu elilesisindo samakilogram angamatshumi amabili - 20kg lithengwa ngamadola alikhulu kodwa selithengwa ezitaladeni ngekhulu lamatshumi amane.
Inengi liveze ukuba ukuze umuntu athole impuphu sekudingeka ukuthi abe ngozwana labezitolo ukuze wazi ukuthi ithengiswa kusiphi isitolo njalo nini.
Abezitolo labo betheswa umlandu wokusebenzelana labathengisela phandle ngoba impuphu isitholakala ithengiswa emigwaqweni ngentengo ekhuphukileyo.
UMnu. Dumisani Sibanda, ohlaziya ezomnotho, uthi ukusilela lokhu kubangelwa yikuba isiphala selizwe sivele asisela lutho.
UNkosikazi Thabiso Songo, isakhamuzi sakoBulawayo, uthi abantu sebelomkhuba wokubuzana ukuthi itholakala ngaphi impuphu.
‘‘Impuphu le okuthiwa yehlisiwe ezitolo ayitholakali. Sesisenza okokuthi ungabona umuntu eyithwele umbuze ukuthi uyithenge ngaphi, uyathi ugijima ususiya khonale uthole siphelile futhi. Vele sebethengisela labantu babo ngoba iroller meal leyi isithengiswa ku-black market. Susithi ungathola abantu belayinile lawe ulayine ngoba ingeyempuphu, kodwa iyakuphelela use layinini ngoba ivele inlutshwane njalo nxa sithengiswa ku-black market iyabe isiyi $70 cash, ngabe iyatholakala ezitolo siyithenge ngabo Eco cash labo swipe.’’
UMnu. Elliot Muza, esinye isakhamuzi sakoBulawayo, uthi ucine ebanjwa ngamandla ukuthenga impuphu emigwaqweni.
“Ngile 10kg yami yempuphu ngiyithenge emarket nge $65 bond. Sengibhodile ama shop lapha abakade bengilayele khona like koOK MART, koGreens bathe ibiyi $40 kodwa iphele ekuseni, khathesi sengivela thenga emarket yikho echeaper khona, esitholakala khona.”
Kumaviki edluleyo uhulumende uphange waguqula isinqumo ayesesithethe sokumisa ukubhadalela enye ingxenye yemali yokuthenga umumbu okwabangela ukuqansa kwentengo yempuphu ngoba inhlanganiso yabagayayo eyeGrain Millers Association of Zimbabwe, yayisithe izadlulisela kubathengi indleko le ngokukhuphula intengo yempuphu.