Abantu abalomkhuhlane wofuba olweTB abebenatha amaphilisi abizwa ngokuthi yi Fixed dose Combination elinathwa kanye kuphela babhekane lobunzima ngoba maphilisi lawa engasatholakali ikakhulu ezibhedlela zikahulumende.
Udokotela Leo Matsika uthi ukusweleka kwamaphilisi lawa kuzadala inhlupho ezinengi ebantwini abawadingayo.
Omunye onatha amaphilisi la unkosikazi Mable Moyo uthi nxa esiyathatha amaphilisi la usephiwa aweviki kuphela kukanti ubevame ukuphiwa awenyanga yonke. Uthi isibhedlela seMpilo athatha kiso amaphilisi sithi amaphilisi la asesilela ngakho bazama ukuthi umuntu wonke athole ingcosana esisele.
Kusenjalo, isibhedlela se Ingutsheni esikhangela abantu abagula inqondo kubikwa sihlaselwe kakhulu ngumkhuhlane weTB njalo izigulane eziphakathi zisengozini yokuthelelana ngenxa yokuthi zihlala zivalelwe njalo amaphilisi lokudla kusilela.
Enyangeni ezimbalwa ezidluleyo idolobho lako Bulawayo beselilenani eliphezulu elabantu abagula umkhuhlane we Drug Resistant TB ngakho ukusilela kwamaphilisi la kulakho ukubangela ukumemetheka komkhuhlane lo.
Your browser doesn’t support HTML5
Udaba lokusilela kwemithi yeTB siluphiwa nguBathabile Masuku