Amalunga enhlanganiso yeBulawayo Agenda amane abotshwe ngoMgqibelo eVictoria Falls avalelwa impelaviki yonke akhululwe ngoMvulo ngumthethwandaba kamantshi eVictoria Falls ngemva kokuvuma ukuthi bahlawule imali yesibambiso, sebail.
Abane laba ababalisa uMmeli Dube, Butholezwe Nyathi, Ntombiyezansi Tozana loThulani Moyo betheswa icala lokwephula umthetho wePOSA ngokwenza imihlangano eFalls bengelamvumo yamapholisa.
UMnu Dube, uNyathi loTozana, bona abahlala koBulawayo bahlawuliswe isibambiso se$100 ngamunye kwathi uMoyo yena ohlala eVictoria Falls uhlawuliswe i$50.
Ukubotshwa kwabane laba kusolwe kakhulu zinhlanganiso ezilwela ilungelo loluntu ezigoqela amagqwetha aweAbammeli, iZimbabwe Lawyers for Human Rights, iCrisis in Zimbabwe Coalition lezinye.
Igqwetha labantu laba uMnu Lizwe Jamela usole kakhulu amapholisa esithi aqhubeka ehlukuluza abantu.