Ayadanisa Amazwe Ezwekazi leAfrica Emidlalweni yeWorld Cup
Chris Gande
Amazwe awezwekazi le Africa amahlanu asemidlalweni yomcintiswano wamazwe womhlaba wonke adlale okudanisayo ngaphandle kweIvory Coast.
WASHINGTON DC —
Isiko lokuthi inkezo ye World Cup nxa idlalelwa ezwekazi le Latin America kayisuki likhanya lingaphela lonyaka kulandela ukunqoba kwamazwe awezwekazi le Europe athi i Holland le Germany ahlohle imiklomelo eminengi emidlalweni yayo yakuqala.
Kuthi elinye lamazwe ewezwekazi le Africa elikade likhangelelwe ukwenza izimanga, i Ghana, idanise abanengi ngoMvulo ngemva kokunqotshwa ngeleMelika nge 2 ka 1. Abafana beGhana badlale kuhle okwamagama kodwa baphanjaniswe yikwehluleka nje ukuhlohla ngoba abeMelika baqede isikhathi esinengi salumdlalo bevimba ukuhlohlwa.
Kuthi amanye amazwe awezwekazi le Africa, abalisa oNigeria ibe ngutshiki lobhanqa le Iran ngeSonto. NgoLwesibili elinye lalamazwe ezwekazi le Africa iAlgeria icine ibhuqwe kakubi inqotshwa 2 ka 1 ngeleBelgium .
Amazwe awezwekazi le Africa mahlanu kumidlalo le yenkezo ye2014 World Cup edlalelwa kwele Brazil.
