UMongameli Robert Mugabe usole amazwe angentshonalanga ngoMvulo ngokulaya amazwe eAfrica ukuthi ehloniphe amalungelo ezitabane.
Ekhuluma emhlanganweni weUnited Nations General Assembly, uMugabe ukhuthaze njalo ukuguqulwa kwendlela ugatsha lweUN Security Council olusebenza ngayo esithi iAfrica layo kumele ibe lesihlalo kulikhansili.
“Ukuhlonipha amalungelo oluntu ngumlandu wawo wonke amazwe, kodwa lingabositshela ngamanye amalungelo esingawaziyo aphikisana lenkolo lesintu sethu. Asizona izitabane thina,” kutsho uMugabe.
UMugabe wazakala ngokuhlambaza izitabane njalo wake wathi ingulube lezinja zingcono kakhulu kulazo.
Uphinde wasola kakhulu izijeziso ezethulelwa uhulumende wakhe ngamazwe agoqela eleMelika lamazwe eEurope esithi izijeziso lezi azikho emthethweni njalo kumele zesulwe.
Uthe eleZimbabwe lilizwe elilokuthula njalo elithanda abangane. Ngalokho, uthe amazwe angadlelani kuhle lelizwe lakhe, agoqela iMelika, kumele akhulumisane ukuze adlelane kuhle.
“Sinxusa wonke amazwe exabana lathi, agoqela iMelika lamazwe eNATO. Siyabanxusa ukuthi bengasebenzisi ukwethusela kumbe ukujezisa. Asikhulumeni., Thina siding ubungane lokukhulumisana kuhle,” kutsho uMugabe.
Ekhuluma emhlanganweni ofanayo, uMongameli weSouth Africa uMnu Jacob Zuma, laye uthe kumele kuguqulwe indlela iUnited Nations esebenza ngayo ukuze izwekazi leAfrica lalo libe lesihlalo kuSecurity Council.
Ugatsha lweUN Security Council luqakathekile ngoba yilo oluthatha izinqumo ezimqoka zeUnited Nations.
Kodwa amalunga ahlala kulolugatsha ngokunaphakade [permanent members] mahlanu kuphela; abalisa iChina, France, Russia, United Kingdon leUnited States.
Ngalokho izwekazi leAfrica lamanye amazwekazi alamazwe asathuthukayo lawo athi afuna izihlalo ezinaphakade kulolu gatsha.