Amalungiselelo eqembu elimela ele Zimbabwe emdlalweni wenguqu elamaWarriors, awokuyaphatheka emcintisweni owe Chan asephazamisekile yikutholakala ukuba kulabadlali abahlanu abalimeleyo njalo abangeke babe sebepholile ngesikhathi imidlalo yalumcintiswano iqala kwele Rwanda emavikini alandelayo.
Abadlali abathi uDanny Phiri, uTafadzwa Kutinyu, uTeenage Hadebe, uHillary Bakacheza kanye lo Takudzwa Mawaya babuyiselwe ngakibo ngoba kutholakale ukuba belimele njalo lokhu kutsho ukuba sekusele abadlali abangamatshumi amabili lesikhombisa.
Kuzamele abaqeqetshi beqembu lesizwe abakhokhelwa nguKallisto Pasuwa bakhuphe abanye abadlali abane kusale abadlali abangamatshumi amabili lantathu okuyibo okuzahanjiswa amagama abo kunhlanganiso ye Caf kodwa uPasuwa utshele intathelizindaba ukuba uzayala elabo labo abangasoze bekhethwe ukuya eRwanda ukuze behlale belungele ukuthatha indawo zalabo abangalimala.
Kusenjalo uPasuwa uthi isifiso sakhe yikuba athole imidlalo emibili eyokuzwana amandla ukuze athathe iqiniso lokuba akhethe baphi abadlali azahamba labo kwele Rwanda.
Lumbono usekelwe yintathelizindaba yezemidlalo uJohn Mufundisi othi yena limidlalo ilakho ukuphathisa kakhulu abaqeqetshi.
Iqembu lama Warriors likusibaya sika Group D njalo lizadlala leqembu le Zambia emdlalweni walo wakuqala mhla zilitshumi lathoba munwe munye kuyonale inyanga.
Umncintiswano wona uyabe uqale mhla zilitshumi lesithupha njalo umdlalo wakuqala uzakuba phakathi kweqembu le Rwanda elizadibana lele Ivory Coast.
Amanye amaqembu akusibaya sika Group D ngathi ele Mali kanye lele Uganda.