UArchbishop Desmond Mpilo Tutu, owalwisana lobandlululo lwabamhlophe kwele South Africa njalo wathola isicoco eseNobel Peace, kasekho.
UTutu ubeseleminyaka yokuzalwa engamatshumi ayisitshiyagalounye (90).
UMongameli Cyril Ramaphosa wethule umbiko othi uTutu, obelesifo semvukuzane, uzakhunjulwa ngumhlaba wonke jikelele ngokulwela ilungelo loluntu.
URamaphosa uthe uTutu usebenze kakhulu ukuze kubelenkululeko kwele South Africa lakwamanye amazwe.
UTutu wake wekela ukuvotela ibandla leAfrican National Congress esithi kalenzi kahle njalo wahlasela lowayengumongameli uMnu. Thabo Mbeki, owakhuluma okungaqedakaliyo ngomkhuhlane weAIDS.
UTutu waphinda waphosa amazwi ahlabayo uMnu. Jacob Zuma, owayengumongameli, esithi wasebenzisa ngendlela engaqondanga imali yelizwe ngesikhathi elungisa umuzi wakhe emaphandleni.
Ngesikhathi sempi yenkululeko kwele South Africa, uTutu, owayekhokhela ibandla lokholo lweSiKhristu eleAnglican Church, wachothoza kakhulu uhulumende esithi akulunganga ukubandlulula abantu abansundu.
Waqhubekela phambili elwela ilungelo loluntu ilizwe selikhululekile wala ukuvotela ibandla leANC esithi liyehluleka ukubusa kahle kwele South Africa.
Emhlabeni wonke jikelele, wachothoza ukukhahlanyezwa kwabantu kwele Palastina esithi abantu laba baphethwe butshapha lilizwe leIsrael lamanye alisekelayo.
Wakhankasela ukuba kujeziswe uRobert Mugabe, owayengumongameli wakwele Zimbabwe, kulandela ukwephula kwakhe ilungelo loluntu lokungaqhubi ukhetho olukhululekileyo.