Abancintisa kukhetho lukaMongameli weMelika abathi uMnu Donald Trump owebandla lamaRepublicans loNkosikazi Kamala Harris owebandla lamaDemocrats baya phambili ngemikhankaso yabo, uTrump esithi uyathandabuza ukuthi uHarris ungumuntu omnyama kanti uHarris laye esithi ufuna ukungqikilana loTrump kunkulumompikiswano.
Sokusele insuku eziphansi kwezilikhulu nje kuphela ukuthi kuvotwe, uScott Stearns weVOA uhlaziya imikhankaso yababili laba lokuthi abantu abazavota bathini.
UTrump utshele abasekeli bakhe esabelweni esibaluleke kakhulu kulolukhetho esePennsylvania ukuthi ancintisana laye emele amaDemocrats ungumkhohlisi.
“Abaphathi bebandla lamaDemocrats abeyamele esandleni sokhohlo okwedlulise amalawulo bafake isiphamaso sabo ukuthi sincintise kulolukhetho silwela izifiso zabo kuphela,” kutsho uTrump.
“UKamala Harris katholanga ngitsho levoti elilodwa. Wenza intando yalabo abapha umkhankaso wakhe imali, abanotha ngokuntshotshela uhulumende wethu ama-billion lama-billion amadola.”
NgoLwesithathu, uTrump ube lomhlangano obulokuphikisana okukhulu lentathelizindaba ezinsundu, lapho athandabuze ubuhlanga bukaNkosikazi Harris, yena olonina oliNdiya loyise onsundu.
"Uhlezi eliNdiya futhi ephakamisa amasiko amaNdiya kuphela. Okweminyaka eminengi ngangingazi ukuthi ungumuntu onsundu kwaze kwafika lapho aphenduka khona esesithi umnyama,” kutsho uTrump.
“Khathesi usefuna ukwaziwa njengomuntu omnyama. Ngakho angazi ukuthi uliNdiya kumbe ungumuntu onsundu.”
U-Harris uselesikhathi eside ezichaza njengomuntu omnyama kanye lesizalwane seMelika esilobuhlanga beNingizimu yeAsia. Selokhu ebe nguye olakho ukuncintisa kukhetho lukaMongameli emele ibandla lamaDemocrats, usekhuphuke kusekelo walingana loTrump ezabelweni eziyisikhombisa ezibalulekeyo, ngokuveza kophenyo olwenziwe ngabezindaba abeBloomberg labeMorning Consult, bekhangela ikakhulu usekelo lwabavoti abasakhulayo, abamnyama labeSpanish.
"Ngakho, umfutho kulumncintiswano uyatshintsha, futhi kulempawu ezikhomba ukuthi uDonald Trump uyawuzwa lumfutho. Kungenzeka ukuthi selikubonile lokhu,” kutsho uHarris.
UNkosikazi Harris utshele umhlangano wokudinga usekelo eGeorge ngoLwesibili ukuthi uTrump ukhanya elokunengi akukhulumayo ngaye kodwa kafuni ukudibana laye kunkulumpikiswano ehlelwe ukwenziwa ngoMpandula.
Uthe, "Hayi-ke Donald, ngithemba uzacabanga kutsha sihlangane kungxoxompikiswano ngoba njengoba isitsho sikubeka; uma ulokuthile ongakutsho ngami, kukhulume ebusweni bami."
U-Harris ukhangelelwe uzwazisa umsekeli wakhe kunsukwana ezilandelayo futhi usazoya emhlanganweni webandla lakhe oweConvention eChicago, lapho alethuba lokuhuga abavoti ngokuchasisa ukuthi kungani beleme bavotele yena kuloTrump.
E-North Carolina, ozavota uWanda Cherry uthi uyathokoza ngenyathelo elithethwe libandla lamaDemocrats elokukhipha obezamilema kukhetho uMongameli Joe Biden lifaka uHarris.
Uthe, “Ngiyajabula ukuthi uMongameli wakunanzelela ukuthi sifuna umuntu osasemutsha ukuba nguMongameli walelilizwe, umuntu ohlakaniphileyo futhi ozimisele ukuncintisa.”
Kodwa omunye njalo ovotayo eGeorgia uT. Stanley akakholwa ukuthi uHarris ulungele ukuba nguMongameli.
"Okwakuqala, ukuthi nguye oncintisayo kungihlasimulisa umzimba ngoba akazilungiselelanga ukuba nguMongameli, futhi kubonakala angathi vele usenguMongameli," kuchasise uStanley.
U-Phil Ownbey, omunye njalo umvoti ohlala eGeorgia, uthi uHarris usefake idlabuzane elikhulu kumncintiswano wokhetho lukaMongameli.
"Ngizamvotela futhi ngiyajabula ngokwenza lokhu. Empeleni ngicabanga ukuthi ukhululeke kakhulu endabeni ezithile, kodwa ukuze sivikelwe umbuso wentando yenengi, ngizamvotela noma kanjani," kutsho uOwnbey.
E-California, umvoti uMarina George uthi uTrump ulosekelo olwanela ukuthi anqobe.
Uthe, “Noma kungena uKamala Harris, noma ngubani abamfakayo ngeke aphumelele. Kwenza nje ukuthi ibandla lamaDemocrats lehlukane kakhulu ngokutshetsha. Futhi konke abakwenzayo kusebenzela amaRepublicans kuhle.
Uphenyo lweBloomberg luveza ukuthi elizweni lonke jikelele uHarris loTrump bangutshikilobhanqa kulumncintiswano sokusele nje amalanga aphansi kwalikhulu ukuthi kuyiwe kukhetho.
Your browser doesn’t support HTML5
Udaba Silwethulelwa nguNtungamili Nkomo