NgoLwesihlanu bekulusuku lokucina ukuba abamele ibandla lama Democrats bethulele idale leSenate izizatho zokuthi yindaba befuna ukuthi uMongameli Donald Trump asuswe esikhundleni.
Abakubandla lama Republicans abazaphikisa okwethulwe ngama Democrats bazakwenza lokhu kusukela ngoMgqibelo lobanje uTrump efuna kwenziwe kusukela ngoMvulo. Ufisa ukuthi kubelabantu abanengi abazabukela udaba lolu kumabona kude eMelika lakwamanye amazwe.
Abethesa uTrump icala lokutshaphaza iwofisi kamongameli lelokuvimba ukuba kwethulelwe idale leHouse of Representatives ubufakazi bokuthi wamisa uncedo lwezikhali okwakumele ziphiwe eleUkrainne, bathi kumele asuswe esikhundleni ngoba wayefuna ukuphendla indlela yokunqoba uMnu. Joe Biden, okhangelelwe ukuba uzangena kukhetho lokudinga umongameli oluzakwenziwa lonyaka.
Bathi uTrump wayefuna ukuthi umongameli wakwele Ukrainne avule icala lobukhohlakali bukaMnu. Hunter Biden, umtaka Joe Biden, owake wasebenzela inkampani ephehla umlilo kagetsi kwele Ukrainne.
UMnu. Adam Schiff loMnu. Jerrold Nadler labanye babo abakubandla lama Democrats badla amalahle besithi uTrump kafanelanga ukuba sesikhundleni sikamongameli ngoba wenza ubukhohlakali obomangalisayo njalo ufuna ukuzenzela santando hatshi ukumela okufunwa ngabantu bakwele Melika.
Kodwa-ke abakubandla lama Republicans kanye lamagqwetha kaTrump bathi icala eletheswa umongameli lenziwa yikuba wanqoba kukhetho luka 2016.
Elinye lamagqwetha kaTrump uJay Sekulow uthi kuyamangalisa ukuthi umongameli wakwele Melika uthoniswa icala elingekho. Kwake kwathoniswa uMongameli Richard Nixon, uMongameli Andrew Johnson loMongameli Bill Clinton kudale leSenate besetheswa amacala atshiyeneyo.
Ukuze sihlaziye okwenzakala edale leSenate, sixoxe loMnu. Den Moyo, ingcwethi kwezombusazwe, othi abakubandla lama Democrats balubeke kahle udaba lwabo loba kungakhanyi kahle ukuthi kulabakubandla lama Republicans abangabasekela ukuba bavotele ukususa uTrump esikhundleni.
Okwamanje idale leSenate ligcwele abantu abakubandla lama Republicans.
Your browser doesn’t support HTML5
Kuqhubekela Phambili Ukuthoniswa Kwecala Lika Donald Trump