Kuqhubekela phambili ukuthoniswa kuka Mongameli Donald Trump edale leSenate lapho etheswa khona icala lokuthi wayefuna ukusebenzisa ilizwe leUkrainne ukwenzela ukungcolisa igama lika Mnu. Joe Biden, okukhanya engani uzancintisana laye kukhetho oluzayo.
Abamele ibandla lama Democrats bathi bafuna kube labafakazi ababedlelana loTrump abazavezela idale leli ukuthi wayefuna ilizwe leUkrainne lethese uMnu. Hunter Biden, umtaka Joe Biden, icala lobukhohlakali okuthiwa kwenzakala engomunye wabaqondisi benkampani ephehla umlilo kagetsi kulelolizwe.
UHunter Biden loyise bayakuphika lokhu besithi uTrump wayefuna ukusebenzisa udaba lolu ukuba anqobe kukhetho oluzayo. Abamele ibandla lama Republicans bavimbe ngendlela zonke ukuthi kungabi lobufakazi ekuthoniseni icala leli okubizwa ngeSilungu ngokuthi yi-Impeachment. Kukhangelelwe ukuthi kuzatshukwana edale leli kuze kuzwele.
Ababona ngokwenzakalayo abagoqela uMnu. Gary Thwala Jackson, ingcwethi kwezombusazwe, bathi ababoni abakubandla lama Republicans bevuma ukuthi kube labafakazi abanjengo John Bolton, owayekuhlangothi lwezomvikela kuhulumende kaTrump, okubikwa ukuthi wabona konke okwenziwa nguTrump owavimba ukuthi kuhanjiswe izikhali kwele Ukrainne kungakavulwa icala lika Hunter Biden.
UJackson uthi kaboni uTrump esuswa esikhundleni ngexa yokuthoniswa kwakhe icala leli.
Your browser doesn’t support HTML5
Bathonisa Icala Lika Mongameli Trump