Ingcwethi zezenotho ziyavumelana ukuthi amazwe awezwekazi leAfrica, agoqela eleZimbabwe, kuqakathekile ukuthi abuthanise imali yentuthuko ngokwawo, hatshi ukuthembela kusizo oluvelela kwamanye amazwe, lona oluqhubeka luncipha, ukuze zigcwaliseke iziqondiso ze Sustainable Development Goals kanye leze Agenda 2063.
Le yimibono evezwe yiziphathamandla zamazwe awezwekazi le Africa, ezingene umhlangano wokuphawula impumela yenhlolisiso enziwe ngabe African Capacity Building Foundation, eye Africa Capacity Report, ephawulwe njalo sikhathi sinye eNairobi kwele Kenya, Accra kwele Ghana kanye lasemahofisini aphathisa linhlanganiso ye ACBF, eGeneva kwele Switzerland.
Umnumzana Patrick Chinamasa umpathintambo wezemali
Obengumhlonitshwa kulomkhosi owenzelwe eweteleni ye Meikles eHarare, umphathintambo wezemali, umnumzana Patrick Chinamasa uthi uhulumende wakhe kade wakunanzelela lokho kungakho sewaqala ukuqhuba inhlelo zokubuthanisa imali kukhangelwa ilizwe elilakho befuqwa yisimo.
Unobhala jikelele enhlanganisweni ye ACBF, uProffesor Emmanuel Nnandozie uthi le yiyo kuphela indlela engaphathisa amazwe la ukuqhuba imisebenzi yentuthuthuko.
Bezikhona iziphathamandla lezikhwicamfundo ezivele emazweni ehlukeneyo,okubalisa uProffessor Rudo Gaidzanwa yena ovumelana lalumbono wokubuthaniswa kwemali esetshenziswa kwezentuthuko phakathi kwala mazwe.
Ziqonqosele iziphathamandla lengcwethi ebezikulomhlangano, phezu kokubumba ubudlelwano obuqinileyo lozulu, bathembeke ohulumende kundlela asebenzisa ngayo imali, ukuze uzulu ahlawule izimali zemithelo ezehlukeneyo ekhululekile.
Kodwa uProffessor Gaidzanwa uthi inkinga eZimbabwe yikuba, uzulu, akasamthembi uhulumende, okumenza angazinikeli ukuhlawula izimali zomthelo.
Umnumzana Dumisani Sithole ungomunye wengcwethi kwezomnotho esebenza phansi kwenhlanganiso yeSwaziland Economic Policy Analysis and Research Centre. Ethi kumqoka ukuba isetshenziswe ngokufaneleyo imali ebuthaniswa yilamazwe.
Impumela yalenhlolisiso, ikuveza sobala ukuthi amazwe awAfrica la, kumele adinge indlela ezinengi zokuzibuthanisela imali yokuqhuba imisebenzi yentuthuko.
Lezi ngezibalisa ukuhlawulisa uzulu labamankampani imali zomthelo ukuthuthukiswa kohlangothi lwezamabhanga, luqedwe udubo lokungathembeki njalo kuvinjwe ukuphuma kwemali ngendlela ezingekho emthethweni.