Umongameli Robert Mugabe uyavuma ukuba ukudonselana kukhona kuZanu PF njalo abezomvikela bayaphatheka labo kulimpi yokucasana ngokuthi ukuxuku liphi lebandla.
Ekhuluma ekuvulweni okusemthethweni umhlangano omkhulu weZanu PF owenziwa minyaka yonke umongameli Mugabe umangalise abanengi lapho eyale ukusola owake waba ngumsekeli wakhe, unkosikazi Joice Mujuru, ethi ngoba lingakazivezi mgceke leliqembu, singekho isizatho sokube lokhe kukhulunywa ngayo.
Ngumsekeli kamongameli lowo,umnumzana Phelekezela Mphoko,ehaya izitemo, ukubabaza uMugabe ngesikhathi emethula kuzulu emhlanganweni lo, owenzelwa eVictoria Falls, uqale mhlaka 7 uphela mhlaka 13.
Emazwini akhe aphume emisakazweni eZimbabwe ukhumbuze uzulu uMugabe ukuba ehlukane lomkhuba wokweyisana, ngoba bengamalunga amaqembu ehlukeneyo, kungela abaqakatheke ukwedlula abanye kungakhathalekile ukuba ngabalwa impi loba hatshi.
Uveze njalo ukuba ingathembekanga inkokheli yeZanu Pf lakuhulumende, ethi lokhu kubuyisela muva imisebenzi yentuthuko njengoba abamazwe abalisa iChina, abafisa ukuzasungula amabhizimusi kuleli, bevinjwa yilokho kungathembeki, wakhuthaza ukujeziswa kanzima kwabatholakala belamacala aloluhlobo.
Kodwa uzulu weHarare okhulumisane le Studio Seven okubalisa umnumzana Pride Mukono, ethi akula okumangalisayo okukhulunywe ngumkhokheli we Zanu PF.
Kungekho okungenziwa ngumongameli Mugabe kudaba lokulwisana okesebandleni lakhe,asekuvuma ukuba kukhona lanxa ubekulandula kuminyaka embalwa edlule kakhulukazi ngesikhathi sikahulumende womanyano kungezelela esinye njalo isakhamuzi seHarare umnumzana Mlondolozi Ndlovu.
Ethi ubegudla iguma, ekhuluma ethukuze induku emqubeni, engawabethi ngamagama lawo maqembu alwisanayo ebandleni lakhe.
UMugabe ozafikisa iminyaka engamatshumi ayisitshiyagalolunye lambili, kunyanga ezimbili ezizayo, sewakhethwa ngabezinye izigaba ukuba nguye ozamela iZanu PF kukhetho luka 2018.
Abacatshangelwa ukuba balwisana kule impi ngabe G40, besekusiza elicatshangelwa ukuba likhokhelwa ngumnumzana Emmerson Mnangagwa kuthi amalunga asalayo kulabo ababekwa umlandu wokusebenzelana lowaxotshwayo, unkosikazi Joice Mujuru ele Gammatox.
Abezomvikela labo babekwa umlandu wokuthatha inhlangothi kulimpi, besekusiza ababephathisana lalabo ababesempini ngesikhathi iqhutshwa impi yenkululeko kanye labo abalwa impi yenkululeko ama War Veterans.
Ngemva kokuba ethule umbiko wakhe umongameli Mugabe, inkokheli zenhlangothi ezitshiyeneyo,kungabaphathintambo kungatsha zikahulumende njalo, bethule kubalandeli beZanu PF, isimo kulezo nhlangothi.