Abalandeli bomdlalo wenguqu eZimbabwe bathukuthele njalo belokukhonona okukhulu phezu kokungadlali kuhle kweqembu elimela isizwe elama Warriors kumncintiswano weChan.
Iqembu elimela ilizwe emdlalweni wenguqu elama Warriors lehluleke ukudlulela kusigaba esilandelayo esomncintiswano weChan oqhutshelwa elizweni leRwanda kulezinsuku ngemva kokudliwa kumidlalo emibili eseliyidlale kusibaya sika Group D.
Abafana bama Warriors batshaywe nge 1 ka nya liqembu le Zambia emdlalweni wabo wakuqala baphinda batshaywa ngempumela efanayo liqembu le Mali okutsho ukuba sebehle baphelelwa ngumphako kulumncintiswano kungakhathalekile ukuba bazadlala njani kumdlalo wabo owokucina leqembu le Uganda.
Abalandeli bomdlalo wenguqu abanengi badaniswe kakhulu yikwehluleka kwaleliqembu kodwa uIphithule Maphosa uthi yena ubevele ekwazi ukuba leliqembu kalisoze lifike ndawo.
Besikukhangelele ukuba amaWarriors azadlala kubi ngoba nxa ukhangela okwenzakala phambilini kokuphakama kweqembu lisiyadlala eRwanda uChiyangwa kumbe sithi iZifa yaxotsha abantu besemsebenzini bephakathi kwamalungiselelo bahlala iviki yonke kungenziwa lutho njalo sonaleso yisikhathi esalahlekayo.
UNdodana Moyo yena uthi vele kudala watshiyana lokulandela ezemidlalo ngoba kulenkethabetshabi ekukhethweni kwabadlali abamela ilizwe yikho umvuzo wokwenza lokho bawutholile labo abakhetha iqembu lesizwe.
Mina mfowethu angilawo amanengi into zemidlalo kwelakithi lapha ngakubona kudala ukuba yizinto zanganxanye yikho kwanele khonokho okwenzakeleyo they deserve it.
Intathelizindaba yezemidlalo esebenzela edolobheni lako Bulawayo uJohn Mufundisi yena akavumelani lo Moyo njalo uthi abaqeqetshi basuke baphazamiswa yikuba kube labadlali abathenjiweyo abasuke balimala phambilini kokuba iqembu liye eRwanda.
Into engiyibonile ephazamise ukudlala kweqembu yikuba abadlali abaqakathekileyo abafana lo Danny Deco Phiri kanye lo Teenage Hadebe abasaphumelelanga ukuya eRwanda ikanti lodaba lwe experience lalo kumele silukhangele ngoba iqembu leZambia lilabadlali abale experience ikanti kwelethu iqembu kugcwele abafana abancane.
Iqembu le Zimbabwe kalizange lithole ithuba lokuzwana amandla leqembu elimela elinye ilizwe phambilini kokuyaphathekla kumncintiswano we Chan okuyinto uMakhosini Nhliziyo athi layo idale ukuba leliqembu lingaphumeleli.
Ngibona angathi ngabe leliqembu lithole ithuba lokudlala lamanye amaqembu belizaqhuba ngcono ngoba indlela okulungiselelwa ngayo imidlalo efana lale kuqakathekile kakhulu ukwenzela ukuba abadlali behambe sebelungele ukudlala hatshi emizimbeni yabo kanti lasengqondweni.
Iqembu le Zimbabwe alila ngitsho lowodwa umklomelo ngemva kwemidlalo emibili kusibaya sika Group D kodwa lilethuba lokuphuma lithwele imiklomelo emithathu eyokukhipha inhloni nxa lingenelisa ukunqoba ele Uganda emdlalweni walo wokucina.
Imibiko ephuma kwele Rwanda ithi umqeqetshi weqembu lama Warriors uKallisto Pasuwa uxolise kumphakathi ngokudlala okwenziwe liqembu lakhe esithi imbangela yikuba leliqembu libunjwa ngabadlali abasakhulayo.