Kusehlakalo esiveza sobala ukungenela kwebutho kwezombusazwe, kulamasotsha angafika amakhulu amahlanu, 500 abikwa engene ezitaladeni zeMasvingo emaJange Shopping Center ngeSonto etshengisela esithi afuna uMongameli Mugabe ahlale embusweni kuze kubenaphakade.
Amasotsha la ebehlome ngenkafulakufa njalo ebehlabela ingoma ezitshiye uzulu wedolobho leli ethithibele.
Ababone imbedumehlwana le isenzakala bathi enye yengoma lezi ngebisithi ngesiShona “Ukatanga gamba redu watotanga hondo” okutsho ukuthi ungaqala ibutho lethu suqale inkalakatha yempi ongasoze uyimele.
Kunsukwana ezedluleyo, umphathintambo obona ngezomvikela njalo eyisiphathamandla seZANU-PF uMnu Emmerson Mnangagwa uthe lanxa ibandla lakhe lingaze linqotshwe yiMDC kukhetho oluzayo, kalisoze liyinikeze intambo zombuso.
Amazwi la seke ethulwa langumgcinisihlalo weZANU-PF uMnu Simon Khaya Moyo kanye loMnu Dydimus Mutasa oyisiphathamandla njalo salelibandla.
Ukungenela kwamasotsha lokhu kundaba zombusazwe esekela iZANU-PF yinto esolwe kakhulu ngamacele womabili eMDC.
Isikhulumeli seMDC ekhokhelwa nguMnu Arthur Mutambara, uMnu Nhlanhla Dube uthe kulihlazo elikhulu okwenziwe ngamasotsha eMasvingo.
Amazwi kaDube agcizelelwe nguNkosazana Thabitha Khumalo, umsekeli wesikhulumeli seMDC kaMnu Morgan Tsvangirai yena othe yinto evamileyo ukuthi ibandla leZANU-PF lisebenzise amasotsha lamapholisa ukwethusela uzulu.
Njengoba umsakazo weStudio 7 ungasekeli hlangothi, sixhume isikhulumeli seZANU-PF uMnu Rugare Gumbo yena othe ubengeke akhulume phezu kodaba lolu ngoba ebengakatholi imbiko eneleyo ngalo.
Imizamo yokukhulumisana lomphathintambo wezomvikela, uMnu Emmerson Mnangagwa lamapholisa eMasvingo leHarare yehlule.