Amapholisa abehlomile axotshe imuli ezedlula amakhulu amabili -200 epulazini leAnold Farm Number 10 eMazowe ngoLwesithathu njalo imuli lezi zibikwa zisithi zatshelwa ngamapholisa la ukuthi lokhu kwenzelwa ukuthi umka mongameli uNkosikazi Grace Mugabe enelise ukusungula ibhizimusi eyokulondoloza inyamazana-eye Game Reserve kulindawo.
Abanye abahlala kulindawo abadilizelwe izindlu batshele iStudio 7 ukuthi baxotshwa nje sebehlanyele izilimo zabo emasimini kukanti lemphahla zabo sezihlala egcekeni ngesikhathi izulu lingana loba nini. Abantwana babo babikwa bengasoze benelisa ukuya ezikolo lapho zivulwa.
Inhlanganiso yamagqwetha eyeZimbabwe Lawyers for Human Rights itshele iStudio 7 ukuthi ukususwa kwabantu laba akukho emthethweni ngoba umthethwandaba waphezulu wakumisa lokhu, njalo isithumele iqula lamalunga ayo ukuyahlolisisa loludaba.
Isikhulumi samapholisa uNkosikazi Charity Charamba uthi usahlolisisa loludaba engakachasiseli abantu okwenzakalayo.
Ukuze sihlaziye loludaba, sixoxe loMnu. Max Mnkandla, isiphathamandla senhlanganiso yabalwa impi yekululeko eye Zimbabwe Liberators' Peace Initiative, yena otshele uSithandekile Mhlanga weStudio 7 ukuthi kufanele uhulumende ahlalise abantu ngokusemthethweni njalo laye ahloniphe umthetho ngokungabaxotshi.
Your browser doesn’t support HTML5
Ingxoxo LoMnu. Max Mnkandla