Amapholisa ngoLwesine amise umhlangano wabakhokheli bebandla leMthwakazi Republic Party (MRP) owokugqiba umnyaka obumele uqhutshelwe eNketa Hall koBulawayo okwamalanga amathathu.
Isikhulumeli sebandla leli uMnu. Velile Moyo uthe baphiwa incwadi yokuphatha lumhlangano ngamapholisa mhlaka 23 wayonal'inyanga.
Uthe okubamangalisileyo yikuthi ekuseni sebefuna ukuqala umhlangano bathole kugcwele amapholisa afika phose amatshumi amahlanu (50) esithi alande ukuzomisa lumhlangano.
UMoyo uthe baqhube umhlangano leziphathamandla zamapholisa eziyizo ezazibaphe imvumo kodwa abathoyitholanga imbangela yokumiswa komhlangano.
Welekelele esithi amapholisa avame ukumisa imihlangano yabo esithi awala bantu abeneleyo abalondoloza ukuthula. Uthe kumihlangano yohlobo lolu abayake bayenze, bavame ukuphiwa amapholisa amabili okutsho ukuthi bekulula ukuthumela amapholisa amabili alondoloza ukuthula kulokuthumela angamatshumi amahlanu avimba umhlangano.
Asenelisanga ukuthola umbiko wamapholisa njengoba ucingo lwesikhulumeli samapholisa uAssistant Commissioner Paul Nyathi belungadojwa.
Osaphethe isikhundla sesikhulumeli samapholisa koBulawayo uNkosikazi Nomalanga Msebele yena uthe usadingisisa ngaloludaba njengoba ebengakatholi imibiko ngalo.
Your browser doesn’t support HTML5
Ingxoxo loMnu Velile Moyo.