Amapholisa athi azabopha bonke abazafunyanwa besephula iziqondiso zokwenqabela umkhuhlane weCovid-19, zona eseziqinisiwe, kungakhathelekile ukuthi bangobani.
Iziqondiso lezi ziqiniswe kusukela ngoMvulo ngumphathintambo obona ngezempilakahle uMnu Constantino Chiwenga yena oyethule umbiko ngempelasonto esithi imibuthano yonke ayisavunyelwa ngaphandle kweyezimfa, yona emele ibe labantu abangadluli amatshumi amathathu, 30.
Amabhizimusi asevunyelwa ukusebenza kusukela ngehola lesitshiyangalombili ekuseni, 8 O’clock ayevalwa ngehola lesithupha kusihlwa, ngo6pm.
UChiwenga uthi uhulumende uthethe lelinyathelo ngoba umkhuhlane weCoronavirus usumemetheka kakhulu kulezinsuku.
Kumbiko awethula ngoMvulo, amapholisa axwayise abantu ukuthi balandele iziqondiso lezi ngokugcweleyo.
Athe njalo abathengisa utshwala, abama-bottle store kumele basebenze phakathi kwesikhathi abasibekelweyo kusukela ngo10am ekuseni besiyatshayisa ngo4 ntambama.
Athe abazatholakala bevulile kumbe indlamanzi ezizatholakala zinathela ezimoteni zizabotshwa.
NgeSonto kufunyanwe abantu abalikhulu lasikhombisa, 107, belomkhuhlane weCovid-19 kodwa akekho obhubhileyo.
Lokhu kukhweze inani lasebetholakale belomkhuhlane lo laya ku39,959 kuthi asebebhubhile bayinkulungwane elamakhulu edlula ayisithupha, 1,632.
Abahlatshwe ijekiseni yalumkhuhlane eyakuqala izolo bangu967, kuthi abahlatshwe eyesibili bangu2,693. Asebehlatshwe ijekiseni yakuqala bonke sebengu693,147 kuthi asebehlatshwe eyesibili sebengu413,911.
Amadolobho abalisa eleKaroi, Kariba leKwekwe avaliwe ngoba lumkhuhlane usumemetheka kakhulu kulezondawo.
Isiphathamandla senhlanganiso ephathisa kunhlelo zeCovid-19 eyeZimbabwe Christian Alliance uMnu Useni Sibanda utshele iStudio 7 ukuthi umuntu wonke kumele athathe amanyathelo okuzivikela.
Your browser doesn’t support HTML5
Ingxoxo loMnu Useni Sibanda
Lanxa uhulumende eseqinise iziqondiso lezi, abanye bathi kuzaba nzima ukuwuqeda lumkhuhlane ngoba udubo lokuswelakala kwezimota ezithwala uzulu kubangela ukuthi abantu baminyane emabhasini eZupco, lapho abalakho ukuthelelana khona lumkhuhlane.
Your browser doesn’t support HTML5
Udaba Siluphiwa nguGibbs Dube