Amapholisa akweleSouth Africa athi asebophe izizalwane zakwamanye amazwe ezinengi kakhulu, ezigoqela ezeZimbabwe ezingelamaphepha, okokuthi aseswela lendawo zokuzigcinela.
Lokhu kuvezwe ngusikomitshi wamapholisa esabelweni saKwaZulu Natal uMnu Nhlanhla Mkhwananzi ngoLwesibili ngemva kokubotshwa kwabantu abedlula ikhulu, 120, eDurban.
Ngaphandle kwabokuza abangelamfanelo, amapholisa akweleSouth Africa abophe njalo abantu abagcine imibhobho engelamalayisensi kanye lezigilamkhuba ezithumba izitezi besezibhadalisa abantu imali yokuhlala zizenza zona omastanda.
EleZimbabwe yilo elilezizalwane ezinengi kweleSouth Africa ukwedlula abanye wonke amazwe, ezedlula kancane isigidi, 1.012 million, njalo inengi alilawo amaphepha.
Isikhulumeli senhlanganiso emela abeZimbabwe kweleSouth Africa eyeZimbabwe Community in South Africa uMnu Bongani Mkhwananzi utshele iStudio 7 ukuthi abangelamaphepha baboniswa okwabonwa yingidi kulezinsuku.