Icele leMDC elikhokhelwa nguMnu Morgan Tsvangirai selisole amapholisa ngokuqhubeka ezama ukuvimba imihlangano kaMnu Tsvangirai labasekeli bebandla lakhe eHarare.
Ngeviki edluleyo amapholisa avimbe imihlangano kaTsvangirai eHarare, azozama njalo ukumvimba njalo kuliviki.
Kodwa acine semvumele kulandela ukukhulumisana phakathi kweziphathamandla zebandla lakhe losikomitshi wamapholisa uAugustine Chihuri.
NgoLwesine ntambama khona uTsvangirai ubekhangelelwe ukwenza umhlangano eBudiriro labasekeli bebandla lakhe ebazisa ngokwenzakalayo kuhulumende womanyano.
Omunye wabaphathintambo bogatsha olubona ngokwenzakala elizweni njalo engowe MDC kaTsvangirai uNkosazana Theresa Makone usole kakhulu ukwenza kwamapholisa.
Insolo kaMakone igcizelelwe ngumsekeli wesikhulumeli salelicele uNkosazana Thabitha Khumalo.
"Kusobala ukuthi ibandla leZanu PF yilo elisebenzelana lamapholisa ekuvimbeni imihlangano yebandla lethu," kutsho uMaKhumalo.
Ukuhlaziya loludaba uNtungamili Nkomo weStudio 7 uxhume ingcwethi ecubungula ezombusazwe uMnu Effie Dlela Ncube yena othe ukwenza kwamapholisa kuveza sobala ukuthi iMDC ayilamandla kuhulumende womanyano.