Umthethwandaba kamantshi sunikeze amapholisa imvumo yokuthi anikezwe imbali yencingo zikaMnu Tendai Biti yinkampani kamakhalekhukhwini eyeEconet ukuze acwayisise ukuthi kaphatheki na kundaba eziphathelane lokungethembeki.
I Econet ithi izandla zayo zibotshiwe ngoba umthetho weInterception of Communication Act uyibamba ngamandla ukuthi inike amapholisa konke akudingayo ngoBiti.
Amagqwetha kaBiti wona sekhweze isicelo edale leHigh Court edinga ukuvinjwa kweEconet ukuthi inikeze amapholisa imbali eveza ukuthi encingweni zakhe uBiti ukhuluma lobani, lokuthi kuyini ayabe ekukhuluma.
Amapholisa athi acabangela ukuthi uBiti wenza imisebenzi yokungethembeki. Kodwa isikhulumeli seMDC ekhokhelwa nguMnu Morgan Tsvangirai uNkosazana Thabitha Khumalo uthe le yindlela yokuhlukuluza uBiti esegcekeni.
Kunjalo nje, izisebenzi ezinhlanu ezisebenzela ehofisini kaBiti ezibotshelwe ukungethembeki zibikwa zithwaliswe nzima ngamapolisa eHarare Central.
Ababotshiweyo ngabathi uNkosikazi Petronella Chishawa, uNkosikazi Linda Kembo labanye abathathu abangakaqanjwa ngamagama.
UChishawa wetheswa icala lokuhlala emazweni kungelamvumo kahulumende okwenyanga ezintathu ethola i allowance yamakhulu amahlanu amadola eMelika ngelanga-$500.
Amapholisa aphinde amethese icala lokuthi wavumelana labanye bakhe laba asebebotshiwe ukuthi bathenge impahla etshiyeneyo eyayifuneka emhlanganweni weEuro-money Conference eHarare ngoMbimbitho bengalandelanga imithetho yamaTenders.
Bacatshangelwa ukuthi bathole phose inkulungwane ezinhlanu zamadollar eMelika ekuthengeni impahla le kungela mvumo.
Ingcwethi kwezenotho uMnu Masimba Kuchera utshele u Gibbs Dube weStudio 7 ukuthi akumangalisi ukubotshwa kwezisebenzi lezi. Amazwi akhe agcizelelwe yingcwethi kwezombusazwe uMnu Nkululeko Sibanda.