Amapholisa namuhla abophe amalunga eZimbabwe National Students Union kumbe iZINASU abangamatshumi amane lanhlanu – 45 eHarare akade esemhlanganweni owokuhlela inhlelo zabo zalonyaka lokunye.
Lokhu kwenzakala uhulumende kaMongameli Emmerson Mnangagwa engavumeli ukuthi abantu benze imihlangano etshiyenoyo ngesikhathi kulungiselelwa umhlangano omkhulu oweSouthern African Development Summit.
Abafundi laba bebethe gwaqa eZESA Training Centre emhlanganweni weZINASU General Council lapho okufike khona amapholisa awuphazamisa. Ngemva kokubotshwa kwabo, bathwalelwe enkambeni yamapholisa eHarare Central Police Station lapho ababhadaliswe imali ye-fayindi besetheswa amacala okubuthana bephazamisa ukuthula. Abanye babo balimele njalo basesibhedlela.
Omunye obesemhlanganweni lowu nguGugulethu Sibindi ofunda eGweru Polytechnic othi amapholisa atshaye alimaza abafundi laba bengakababophi.
“Besibuthene sisenza umhlangano wethu amapholisa afika aqala ukusitshaya besifaka ezimoteni. Kubuhlungu ukube ukuba siphazamiswe sizenzela umhlangano wethu.’’
Ilunga leZINASU uVital Maronjese
UMokwetsi Nare laye kalamathe ngokwenziwe ngamapholisa.
“Kulimele abanye abangafika itshumi ngesikhathi besitshaya. Sizame ukubachasisele kodwa kabazange befune ukusilalela’’
UMokwetsi uthi abafundi sebekhathele ngokukhahlanyezwa ngamapholisa.
“Lokhu kuveza ukuba elizweni akula kuthula uhulumende wethusela abantu bakhe njalo kafuni ukuba uzulu atsho imbono yakhe’’
Isikhulumeli samapholisa uCommissioner Paul Nyathi uthi abafundi laba babotshelwe udlakela abalwenze eZESA Training Center. Uthi benze lokhu kusanda kufika amapholisa endaweni le. Kodwa abafundi bathi batshaywe njalo babotshelwe ize ngoba bebeqhuba umhlangano wabo ngokuthula.
Kulabanye abantu eZimbabwe lenhlanganiso ezizimeleyo abachothoza okwenziwa ngamapholisa kulez’insuku ngesikhathi kulungiselelwa umhlangano weSADC. Omunye wabo nguMnu. Comfort Mpofu.
“Lokhu kutshengisa ukuba uhulumende ulokwesaba abatsha njalo kaqakathekisi amalungelo oluntu. Kunzima kuba uzulu athembe uhulumende ikakhulu ngesikhathi se SADC Summit.’’
Kodwa uMnu. Mabutho Moyo, ilunga lebandla leZanu PF, uthi kusemthethweni okwenziwa ngamapholisa eZimbabwe.
“Asila zitha thina siding abangane. Akusincedi ukuba kubotshwe abantu njalo akula le SADC lokhu, kukhona abakwenzileyo yikho bebotshiwe.’’
Okwamanje kulamalunga ebandla leCitizens Coalition for Change, agoqela umkhokheli wabo uMnu. Jameson Timba, abavalelwe ejele bemelele ukuthoniswa amacala okungena umhlangano weDay of the African Child okungekho emthethweni.
Kuke kwabotshwa kumaviki edluleyo amalunga eNational Democratic Working Group ayenika abaswelayo ukudla eHarare. Kubikwa njalo ukuba amapholisa namuhla aphazamise umhlangano weNational Association of Non-Governmental Organizations.