Indizamtshina yohlobo lwe-helicopter okubikwa ukuba bekumele ithwale uMongameli Emmerson Mnangagwa esuka eMasvingo esiya eHarare, iwile isanda kusuka eMasvingo izolo.
UMnangagwa ubethakazelela usuku lwakhe lokuzalwa edolobheni leli njalo bekunanzwa inkosi yakudala uKing Munhumutapa.
Amapholisa eZimbabwe, uhulumende lebutho lemoyeni eleAir Force of Zimbabwe abayibo abatshayela indizamtshina ezithwala inkokheli zika hulumende kuhlanganisela uMnangagwa lomsekeli wakhe uMnu. Constantino Chiwenga, bathule zwi ngengozi le.
UCommissioner Paul Nyathi, isikhulumeli samapholisa, uthe kumele intathelizindaba zikhulume ngodaba lolu labakubutho leAir Force of Zimbabwe, abalileyo ukukhuluma ngokwenzakale izolo eMasvingo. Indizamtshina ewileyo ngeyohlobo lwakudala njalo iphose ifane leyawela esigabeni seArcturas ngomnyaka ka2021 yabulala abantu abane.
Leyo yayingeyohlobo lwe Agusta Bell AB 412 helicopter. Kulabantu abathi le yingozi makhaza kube labanye njalo abacabangela ukuba mhlawumbe bekuthiywe omunye wabakhokheli belizwe ngesikhathi kuxokozela kuhulumende lakubandla eliphikisayo ngemizamo yokuba uMnangagwa eqhubekela phambili esembusweni. Kukhanya engani umsekeli wakhe uChiwenga uyakuphikisa lokhu labanye bakhe.
Kambe indizamtshina le ibikanikwe ngendlela yokuthi kumele ibulale omunye wabo? Abakubandla leZanu PF bayakuphika lokhu besithi yingozi nje eyenzakale izolo. Umkhokheli wenhlanganiso esebenzisana lebandla leZanu-PF eyeForever Associate of Zimbabwe, uMnu. Kudakwashe Munsaka, uchasisa ngesehlakalo lesi
"Kulusizi kakhulu ukubana indizamtshina ye Airforce yase Zimbabwe ebeyiyona iS332 Cuba ethwala ama VIP iyehluleke ukusukuma kakuhle ivela e-airport eMasvingo izolo ntambama lapha ethe iyehlulekile ukuthi iphaphe kakuhle yabe izama ukuthi iphenduke ime kwabe kusehlula yabe isiwa.”
Indizatshina le ivame ukuthwala uMnangagwa kodwa kuthiwa ubengekho phakathi kwayo ngesikhathi isiwa. LoChiwenga laye ubengekho kuleyondawo. UMunsaka uthi wonke umuntu obephakathi kwendizamtshina la kalimalanga.
"Akula olimeleyo, akula kulaba esingathi ngumongameli abelizwe akade bephakathi kwendizamtshina leyo sisamelele njenge lizwe ukubana idepartment ye aviation ikhiphe umbiko ogcweleyo njalo oleqiniso ukubana imbangela yalokho yikuyini."
Unobhala jikelele webandla eliphikisayo eleFreedom Alliance, uMnu. Nhlanhla Moses Ncube, uthi ukuwa kwalindizamtshina kubethusile.
"Sikubona kuyinto ehlasimulisa umzimba esingathi kuyi sehlakalo esibi esethusayo kodwa khonalokhu kuyatshengisa ukuthi ukufa komnotho welizwe yikho okwenza ukuthi uthole izimota zibulala abantu amaframatshina esiwa ebulala abantu ngoba ungathola ukuthi iyabe ivele ingalungisekanga kahle. Thina loba sibaphikisa kodwa ayisikho ukuthi sibafisela ukuthi kabawiswe zindizamtshina zabo sifuna ukuthi sibatshele iqiniso bengabaphilileyo."
Ohlaziya ezombusazwe ezimele, uMnu. Fortune Mlalazi, uthi kungaba lesandla semfene kusehlakalo lesi.
"Uhulumende lo weZanu PF siyabazi ukubana bayingozi okunganani especially uma sekusiya kuma issues ukuthi ngubani ozathatha over ama issues esuccession kodwa ngombono wami eh ngingabheki ukuthi kulomthakathi okhona asilayo icapacity yoku renewer infrastructure yethu oku exposer ilizwe lakithi ukubana incase of an conflict eh asila capacity yokuzivikela yikho ke ubona ngitsho lalezi ezithwala ama vip ziyingozi."
Kukanti uMnu. Rejoice Ngwenya ingcwethi ecubungula ezenotho ekunhlanganiso yeCommon Market for Liberal Solutions uthi indizamtshina le iziwele.
"Iqiniso yikuthi indizamtshina njenge mota kumbe ibus iyavelelwa layo yingozi kodwa ke nxa kuzathwala umongameli abaqakathekileyo omakanika lezi ncitshi zesi nsimbi kufanele zikhuthale kodwa angiboni lutho la mbone ngathi yingozi nje eyenza ukuthi abantu becabangele kungela lutho."
Akwaziwa ukuthi uMnangagwa uhambe njani eHarare esuka eMasvingo, njalo umbiko wesehlakalo lesi awukakhitshwa lugatsha lweCivil Aviation of Zimbabwe, ekhangelane lezendizamtshina zonke.
SEE ALSO:
Udaba Esilwethulelwe NguEzra Tshisa Sibanda