Ikhomithi ye ZIFA Electoral Committee ebona ngezokhetho enhlanganisweni yenguqu eye Zimbabwe Football Association ikhangelelwe ukuhlangana ngoMgqibelo eHarare ihlolisisa amaphepha alabo abafuna ukuncintisa esikhundleni somqondisi we ZIFA lezinye.
Isikhulumeli seZIFA, uMnu. Xolisani Gwesela, uthi ikhomithi le izahlolisisa amaphepha wokhetho afakwe nguMnu. Phillip Chiyangwa, uMnu. Trevor Carlisie Juul, uMnu. Leslie Gwindi loMnu. James Takavada abadinga ukuncintisa kulesi sikhundla sikamqondisi weZIFA kukhetho oluzakwenziwa ngenyanga ezayo.
Isikhulumeli seZifa uXolani Gwesela
UGwesela uthi bazahlolisisa njalo amaphepha afakwe kuZIFA Electoral Committee yilabo abadinga ukucintisa kukhetho lokudinga umsekeli kamqondisi weZIFA, ababalisa uMnu. Omega Sibanda, uMnu. Elkanah Dube loMnu. Lincoln Mutasa.
Abanye njalo abalamaphepha azahlolisiswa yilabo abafuna ukungena edale le ZIFA Board abaphose bafike itshumi.
“Inhlawulo yokufaka amaphepha okuthi umuntu angene kulolu khetho ifika kunkulungwane ezimbili zamadollar-$2,000, njalo abane engikhulume ngabo abagoqela uChiyangwa, uGwindi labanye, sikhuluma kanje sebebhadele eyabo imali yokufaka amaphepha”, utsho uGwesela.