Uzulu wako Bulawayo uthi amavinkili athengisa imithi asefuna babhadale ngedola leMelika okwenza behluleke ukufinyelela limithi. Uzulu ukhala njalo lokuthi intengo isikhuphuke kakhulu okufana lokuthi sebegwetshelwe ukufa ngababusayo ngoba imikhuhlane abalayo ifuna imithi nsukunzonke kodwa ayisathengeki.
Ngesikhathi isimo somnotho siqhubeka sisiba nzima elizweni, kwabagulayo khona kuphambili bengatholi ukwelatshwa okupheleleyo ngenxa yokuvala kwamavinkili athengisa imithi kanye lokuthi abala mali yakwamanye amazwe.
AmaPharmacy amanengi asethengisa ngedola leMelika kuphela njalo engela mithi eyiyo edingwa ngabantu kakhulu. Uhlupho olukhulu lubikwa kuyikuswelakala kwemali yokuyathenga phandle kwelizwe njalo akuqali ngabo ngoba labo bevele bethenga ngemali yaphandle.
Umnumzana Bolton Mhlanga obeme phandle kwenye iPharmacy wehhluleka ukuthola umuthi uthi bayalile ukumthengisela ngenxa yokuthi ubephethe iBond note. U Mhlanga uthi manengi amaPharmacy abevalile kuthiwa basahlolisisa ukuthi balempahla ezinganani, “Closed for Stock Taking”.
“Ngike ngazama lapha ukuthi ngiyethenga umuthi wenzinyo kweyinye ipharmacy, manje kade ngithwele iBond Note manje bathe abathathi iBond Note bafuna iUS Dollar. Ngize ngaphuma ngayadinga iUSD yakhona ngoba amanye ebhalwe “Closed for Stock Taking”.
Ugogo Dlamini sebethwele nzima ngoba bengelamali yakwamanye amazwe, ikakhulu labo abangela bantwana phandle kwelizwe.
“Thina ogogo asisakwazi vele sesiyalahlwa, asilabantwana asizalanga. Khathesi amatshukela ayadula amaCooking oil awabonakali, kuthiwa sithenge ngeUSA sithenge ngeRand. Sile BP sileSugar Diabetes, kuthiwa sithenge nge USA sithenge ngeRand.”
Inengi labanini bamaPharmacy bathi abangeke bakhuluma lentathelizindaba ngoba besesabela ukuthi bengazithezela olulenkume. Umnumzana Johannes Cloete olePharmacy koBulawayo uthi isimo lesi esedola leMelika saqala kudala lapho bekhuluma ngokulinganisa iDollar leBond note.
“Inkinga ekhona yikuthi iSituation leyi eyeUSD has been going on for a very long time befaka iBond kusiba yi one is to one. Ngokuya kwesikljhathi ngenxa yokuthi iRBZ ibingela USD imali okumele bayiphe amaManufactures ukuthi bathenge oversees ibingekho lokhu kubangela ukuthi lathi kibo sithenge ngeUSD. Siyacina sisehluleka ukthi sithengise singathatha iBond.”
Abayibo abathengisayo bathi bona balandela lokhu abakutshelwa ngabaninivinkili ababaqatshileyo. UNkosazana Sibonile Ncube uthi bona besabela imisebenzi yabo yikho besenza lokho.
“Thina okwenza siCharge amaCustomers ngeForex yikuthi amaBosses athenga ngeRand athenga ngeUSD, so yhina ukuthi sithengise ngeBond alisisi ndawo iBond leli.”
Isimo somnothop elizweni siqhubeka singamanga kuhle njalo osebunzimeni obukhulu ngabantu makhaza ngoba laba ababusayo besithi bengagula baye kwamanye amazwe betshiya uzulu engelamithi.
Uhulumende usanda kunika isigaba semithi imali ephose ibe yizigidi eziyisikhombisa kuzigidi ezingamatshumi amabili lane ezifunekayo. Ingcosana le ayifiki ndawo njalo isibangele ukuthi uhlupho lolu luqhubekele phambili.
Laba abathengisayo bazigezile besithi ngabe labo bathenga ngemali yakuleli bebezathengisa ngeyakuleli kodwa akunjalo.
Your browser doesn’t support HTML5
Udaba lwamapharmacy asethengisa ngedollar leMelika siluphiwa nguBathabile Masuku