Umphathintambo wezemali uMnu. Tendai Biti uthi amabhanga eZimbabwe akweledisa amankampani imali yokuthenga imitshina yamafekithali asethole izigidi ezingamatshumi amathathu zamadollar kuhlelo lwe Zimbabwe Economic and Trade Revival Facility olusungulwe nyakenye.
UBiti ubikwa ethi okumangalisayo yikuthi malutshwana amankampani aweMandebeleni adinga izikwelede lezi.
Uthi amankampani la asesebenzise izigidi ezilitshumi lambili zamadollar eMelika kuhlelo lolu.
Uthi lokhu kutshengisa ukuthi abatholi imbiko ecacileyo ephathelane lokuthi uhlelo lolu lwenziwa njani.
UBiti uthi amankampani akwele Mandebeleni abekhangelelwe ukudinga imali le ngamehlo abomvu njengoba evala okungapheliyo ngenxa yokuswela imali yokuthuthukisa amafekithali.
Ingcwethi kwezenotho uMnu. James Wade uthi okunye okwesatshwa ngamankampani la yikuthi kawafuni ukuba lezikwelede ezisindayo.
Eyinye njalo ingcwethi kwezenotho uMnu. Prosper Chitambara uthi okuhluphayo yikuthi uhulumende kakwazi ukwethulela uzulu inhlelo ezitshiyeneyo.
Umnu. Bulisani Ncube omele inhlanganiso yamankampani ye Zimbabwe National Chamber of Commerce koBulawayo uthi okukhathazayo yikuthi inhlelo lezi kazivezwa nguhulumende ngesikhathi esifunakalayo.
