Amanye aMaNdebele ahlala kwele Botswana baphezu kwemizamo yokuvuselela amasiko, ngesikhathi ebhekane lokutshabalala kwawo, ikakhulu ebantwaneni abazalelwa kulelolizwe. Kodwa imizamo le ibhekana lobunzima bokuhlangana kwamasiko atshiyeneyo kwele Botswana.
Ukulondoloza amasiko ngomunye umlandu onzima obhekane lenengi eliphuma eZimbabwe lisiyadinga ukuziphilisa kwamanye amazwe.
Inengi selile muli ezikhuliswe emazweni atshiyeneyo, kukanti abanye bayenda kumbe bathathe kulawomazwe abafikela kuwo.
Lokhu kutsho ukuthi amasiko abo asequngiwe, ngoba esehlangane leyemihlobo etshiyeneyo.
Inhlanganiso ebona ngokuhamba kwabantu phakathi kwamazwe, eye International Organisation for Migration (IOM) ithi amasiko ngezinye zezinto eziphambaniseka kakhulu uma abantu besuka endaweni yabo besiyahlala leminye imhlobo.
Kwele Botswana inhlanganiso yeSibanye Cultural Society, egxile kakhulu ekulondolozeni amasiko eSiNdebeleni, izama konke okusemandleni ayo ukuthi imkhuba lezenzo zingalahleki, ikakhulu ebantwaneni.
Ukudla okuphekwe ngabadabuka eZimbabwe abahlala kwele Botswana
Okhokhela linhlanganiso, uMnunzana Collen Dumani Mlalazi, uthi akulula ukuthi balondoloze amasiko ngomumo okhona bengaphandle kwelizwe.
“Kunzima kakhulu ngoba abantu sebethethe amasiko esilungu, okudlula wona awalapha kwele Botswana. Ngabe sithi sebethethe aweBotswana kuba ngcono kodwa sebethethe awesikhiwa. Lolimi abasalwazi.”
Okunhlanganiso yeZimbabwe Community kwele Botswana, uMnunzana Cephas Tshuma, uthi umumo okhona wenza kubenzima ukuthi amasiko ehlale eqotho, engaqungwa yikuhlangana leminye imihlobo.
“Sifika lapha siqale ukufunda amasiko atshiyeneyo. Okokuqala lulimi, uthola abantwana bafunda ezikolo lapho okufundiswa ngesilungu kuphela, kukanti okwesibili yikuthi sithatha amasiko abo ngoba vele sisemzini.”
UNkosazana Rita Hadebe uthi noma nje impi yokuvuselela amasiko ikhanya engathi ayinqobeki, kumele kuzanywe ngamandla ukuwalondoloza.
“Thina njengenhlanganiso yamasiko singabona ukuthi abantwana bethu bayathola ukufunda ulimi lwethu, yikho esingakuzama ngoba sebefunda ngesikhiwa kumbe ngeSetswana."
Ukudla kwesintu okuphekwe ngabadabuka eZimbabwe abahlala kwele Botswana
UMnunzana Bekithemba Jele uthi okuhle yikuthi eleBotswana liyavumela ukuthi kube lendlela eminye imihlobo ukuthi igcine amasiko ayo.
“Kodwa kubanzima ngoba abantu esihleli labo abalamasiko ahambelana lathi okwenza ukuthi abantwana bethu becine bengazi ukuthi okuyikho okumele sikulondoloze okungokwethu yikuphi.”
Inengi likhala ngokuthi ikakhulu intsha yalamuhla ayisakwazi imvunulo, ulimi, ukudla kanye lemikhuba ehambelana lendlela zokuziphatha
Inhlanganiso yeSibanye yenza imizamo minyaka yonke ukuthi ibe lombuthano obizwa ngokuthi yiMbizo lapho okunxuswa abazamasiko.
Aseke bahamba emkhosini lo bagoqela owaziwa kakhulu ngokugcina imbali yamasiko uMnunzana Phathisa Nyathi kanye lowakhethwa ngumdeni wako Khumali ukuba abeyiNkosi yesizwe sika Mthwakazi, uBulelani Lobhengula Khumalo, yonke le kuyimizamo ikakhulu ukutshengisa abantwana ukuthi bavela ngaphi, njalo bayakuphi.
Abanye njalo bavame ukuya kumgubho weNkosi uMzilikazi eZimbabwe minyaka yonke.
SEE ALSO:
Udaba Esilwethulelwe NguMqondisi Dube