Intshantshu zanyakenye emdlalweni wenguqu esigabeni saphezulu ese PSL okuliqembu le Chicken Inn libikwa selilensuku ezimbalwa liqale amalungiselelo alo emidlalo yalonyaka ngoba lona lizaphatheka emidlalweni eyokudinga intshantshu zezwekazi le Africa kumncintiswano weAfrican Champions League.
Elinye iqembu elikusimo esifanayo ngele Harare City lona elizaphatheka kumncintiswano we Caf Confederations Cup. Lalo iqembu le Harare City selilensuku ezimbalwa liqale ukulungiselela imidlalo yalonyaka ikanti iqembu elisile ngesikhala senalithi ekugunyulweni kusigaba saphezulu ele Tsholotsho liqale ngoLwesine olwedlulileyo amalungiselelo alo.
Umqeqetshi weqembu lenguqu ele Tsholotsho FC, uLizwe Sweswe
Umqeqetshi weqembu le Tsholotsho FC, uLizwe Sweswe uthi abadlali abadinga umsebenzi baze ngobunengi babo enkundleni yeWhite City.
Iqembu le Bulawayo City lalo liqale ngeviki edluleyo njalo kubonakale abadlali abanengi abalodumo bedinga umsebenzi. NgoLwesibili iqembu le Highlanders lalo liyaqala awalo amalungiselelo enkundleni yeBarbourfields.
*******************
Kolunye udaba olumayelana lomdlalo wenguqu abadlali beqembu elimela ilizwe bathenjiswe yinkokheli yenhlanganiso yeZifa ukuba yonke imali abazayithola kumncintiswano weChan izakuba ngeyabo.
Lokhu kutsho ukuba iqembu lesizwe lilakho ukwabelana inkulungwane ezilikhulu nxa lingafika liphutshe imidlalo yalo eyezibaya kuyilo elisemsileni.
Lingaphutsha likundawo yesithathu engalaneni yemiklomelo kusibaya sika Group D lizathola inkulungwane ezilikhulu ezilamatshumi amabili lanhlanu kuthi lingafinyelela kusigaba se quarter - final lizathola inkulungwane ezilikhulu lamatshumi ayisikhombisa lanhlanu.
Ukufika kusigaba se semi - final kuzatholisa iqembu leZimbabwe inkulungwane ezingamakhulu amabili lamatshumi amahlanu kuthi ukufika ku final kuzalitholisa inkulungwane ezingamakhulu amane. Iqembu elizaphakamisa inkezo lizathola inkulungwane ezingamakhulu ayisikhombisa lamatshumi amahlanu.
Umncintiswano we Chan uzaqhutshelwa elizweni leRwanda ensukwini ezilandelayo.