Abaphila lobugoga bathi sokudingakala ukuba bephatheke kubanga lokuhlelwa kwenhlelo zikahulumende elizweni ukuze indingeko zabo zithole ithuba lokwamukelwa ngendlela engaphathisa intuthuko yempilo zabo.
Abaphila lobugoga bafole emigwaqeni besuka e-Avondale besiya eBelgravia Sports Club eHarare, ngempelasonto emkhosini wokunanza ilanga labaphila lobugoga emhlabeni jikelele.
Umqondisi wenhlanganiso ye Centre for Disability and Development umnumzana Masimba Kuchera uthi sikhuluma kanje abaphatheki kangako abaphila lobugoga kundaba zokuhlela inhlelo zentuthuko elizweni.
Inhlelo eziqoqwa nguhulumende yizo ezicina ziqondisa ukuqutshwa kenhlelo zokuthuthukisa inhlalakahle kazulu.
Unkosazana Tapiwa Gwenlisa Mushonga olesifo sesikhumba esiphila nzima elangeni ese Albinism uthi sikhuluma kanje abayitholi imithi yamafutha angaphathisa ijwabu labo ethi itholakala ema pharmacy kuphela ithengwa ngentengo efika ku matshumi amabili ama dollar eyimali enengi kakhulu sikhangela ukuba abantu abayitholi imisebenzi ngoba labaqatshi bebangabaqatshi. Uthi bafisa ukuba uhulumende etholise amafutha la ezibhedlela lase ma kilinika elentengo ephansi kumbe ukuwanikeza kungela mbadalo.
UNkosazana Shyleen Moyo wenhlanganiso ye Youth Alliance for Leadership and Development in Africa uthi baphathisana labantu abaphila lobugoga ngendlela ezitshiyeneyo. Uthi Inhlanganiso yakhe izaqhubeka iphathisana labaphila lobugoga ukuze impilo ibe nconwana kibo ethi lokufola okunje kuyanceda ukulimukisa uzulu ukuze ananzelele inkinga ezibhekana labaphila lobugoga.
Ele Zimbabwe lilabantu abaphila lobugoga abangaba yizigidi phose ezimbili -2million, kodwa kulama Senator amabili nje kuphela amela abaphila lobugoga edale le phalamende njalo kungela lelunga elilodwa eliphila lobugoga edale le cabinet. UKuchera uthi ngemva kweminyaka edlula engamatshumi amathathu ilizwe lingazihluphi ngokunanza ilanga labaphila lobugoga lonyaka uhulumende uzamile ukuphatheka.
Abaphila lobugoga bathi zinengi inkinga ababhekana lazo ezigoqela ukungalungiselwa indawo ezihambelana labo, ukulungiselwa okudingakalayo kumfundo yabo lakudaba lwezokwelatshwa. Bathi bakhangelela ukuhlela ukufola okunje behamba ngokwengezelelweyo kwelakusasa, befika endaweni ezitshiyeneyo ezifana lako Bulawayo, Mutare lezinye kuminyaka elandelayo.