Inhlanganiso yeAmanzi Matabeleland South Cooperative eyayibhadalisa amalunga ayo aseSouth Africa imali kusukela ngo2019 ukuze agejelwe imigodi yamanzi emizini yawo kweleZimbabwe, isize yenelisa ukuthenga imota yokugebha imigodile, enye ethwala idiesel lenye eyokuthwala omanjinela.
Ngemva kokulinda umnyaka wonke, amalunga eAmanzi Matabeleland South Cooperative, athabe amanzi te esithi iphupho labo lokuthola amanzi seliseduze lokugcwaliseka.
Omunye wabomanjinela bale inhlanganisole uMnumzana Mthandazo Nyathi wethulele amalunga-la indaba ezimnandi eJohannesburg ngempelaviki.
Okwamanje linhlanganiso isilamalunga edlula amakhulu amane-400 adabuka endaweni ezitshiyeneyo esabelweni seMatabeleland South. Ilunga ngalinye lingene kulinhlanganiso ngamarandi angamakhulu amahlanu (R500) kanti ukuze umuntu agejelwe umgodi kudingeka amarandi azinkulungwane ezilitshumi lasikhombisa (R17,000)).
UMnu. Brian Ngwenya owaseBulilima uthi bathabe kakhulu ngokwenziwe yinhlanganiso yabo.
“Takahana kwazokwazo nehuba lanasi takatenga dzimota dzakatengwa necooperative yedu yevula. Ngatidzibhate zwakanaka tiwane vula. Vula Mukhitshi,” kutsho uMnu. Ngwenya.
Lokhu kugcizelelwe ngumgcinisihlalo wamalunga ahlala eBulilima uMnu. Mzwanyana Moyo.
“Lamhlanje siyakhipha isaga sesiNdebele esithi amagundwane amanengi awala mlindi sifake esesiKhalanga esithi tjinyi babili chikomba chega tjowulula. Siyabonga kakhulu Mat-South ngosukwenzile. This is wonderful. Siyabonga kakhulu.”
LaseGwanda uBishop Adonijah Mabusa laye uthi sebelindele ukugejelwa imigodi.
Unobhala walinhlanganiso uMnumzana Thuso Moyo uthi bekuyindlela engelula. Uthi benelisile ukuqeqetsha abafundi ababili abasekolitshini okuyibo asebesenza umsebenzi wokuhlola indawo ezilamanzi besebenzisa ubucwephetshe besimanjemanje.
Uthi bakhangelele ukuthi lezi imota zilubhekise ekhaya kuliviki umsebenzi wokugebha imigodile uhle uqale kungaphoziswanga maseko. Wengeze wathi sekulendawo ezedlula amakhulu amathathu lapho osekuhlolwe khona kwalungela ukuthi kuqale ukugejwa imigodi.
Your browser doesn’t support HTML5
UThuso Khumalo Uyalandisa