Amalunga edale lephalamende lamakhansila ebandla leCitizens Coalition for Change bathi kabasoze behambe emisebenzini abawukhethelwa nguzulu okwamaviki amabili besenzela ukusekela abanye babo abaxotshiswa nguMnu. Sengezo Tshabangu othi ungunobhala jikelele webandla leli.
UTshabangu uthi abazakwekela bazathwala nzima njalo balakho ukuxotshiswa kumakhansili lakudale lephalamende.
“Amalunga wonke alelibandla athi kawasoze ayesebenza ephalamende lakumakhansila emele izigaba zabo kuze kuyefika umhlaka 25 Mfumfu. Achothoza isinqumo esenziwa nguTshabangu esokuxotshiswa kwabanye babo.”
UMnu. Prince Dube owebandla leCCC omele isigaba seEntumbane-Njube edale lephalamende ukhuthaza abantu ukuthi babazwisise ngesinqumo esenziwe libandla lakhe.
“Sicela ukubana libekezele libelothando libendawonye angisoze ngalitshiya eNtumbane Njube constituency njengo muntu elangikhethayo ngizabe ngilani lokhu nje esikwenzileyo khathesi kumbe esikwenzayo okwe dis engagement yikuzama nje ukusender imessage kakhulukazi kulaba abafuna ukuganga ukuzama ukuthi bakhiphe abantu abakhethwa ngabantu kuma constituencies sizama nje ukusender iprotest message.”
Umsekeli kaMeya uKhansila uDonaldson Mabutho kaWard 9, omunye wabaxotshiswe nguTshabangu, uthi ibandla bangena kuzulu hatshi emawofisini ekhansili.
“Thina sizabe sisebenza lani zakhamizi nyawo lunye lani ma residents eMpopoma our senior citizents lama key stakeholders ethu ,uCouncilor wenu ukhona ngikhona ehofisini yami khathesi ngiserver lina ama residents ka ward 9 Mpopoma. Lokhu okukhulunywayo okwako baba uTshabangu lokhu hayi bayaphupha. Sizobona ukuthi kuyozala nkomoni.”
UTshabangu uthi uzajezise wonke amalunga alelibandla angaxotshwanga engekela ukuya ephalamende lakumakhansili.
“Kasikwazi lokhu ukuthi kulabantu abaza dis engager. Thina sazi ukuthi ama members of parliament baku suspension, bengaqeda isuspension yabo bazahamba emsebenzini bayekwenza umsebenzi lo abawukhethelwayo ukuthi bawenze kodwa nxa kuyikuthi bayabe sebethethe khonokho okuthwa yi dis engagement izembe lizakhala.”
Kusenjalo, amagqwetha ebandla leCCC asebhalele uTshabangu embonisa ngesenzo sakhe sokuloba incwadi yokuxotshisa amalunga alelibandla ephalamende lakumakhansili. UTshabungu uthi kakayitholi incwadi yakhona.
“Siyawuzwa umzila wokuthi baserve ehofisini yako Bulawayo kodwa kengasese babuye bathi khona khona kasbangazi. Kodwa baye receiver ama papers ami bavume ukuthi ngililunga le CCC. So kasikwazi ke ukuthi bawathethe njani lawo mapapers nxa besithi bona abangazi.”
Inengi labahlali bakoBulawayo bathi ukungayisebenza ekhansilini kungabangela ukuthi uhulumende abakhethele amakhansila lawa athiwa ngama commissioners baphathe idolobho lakoBulawayo.
UMnu. Melusi Mpofu oligqwetha koBulawayo uthi amalunga edale lephalamende labo bengaxotshwa bengakhalala ukuya ephalamende okwesikhathi esithize.
Kubelokungazwani emhlanganweni walelibandla amanye amalunga esola isinqumo sokuthi bangasebenzi. Isikhulumeli salelibandla uPromise Mkhwananzi ubengadobhi umakhalekhukhwini wakhe.