Abenhlanganiso yababalisi bezikolo zemaphandleni eye Amalgamated Rural Teachers Union of Zimbabwe (ARTUZ) bathi sebesungule izifundo zebulenjini emizameni yokuncedisa ababhala imihloliso lonyaka ukuthi baqedise izifundo ngoba belahlekelwe yisikhathi bengafundi ngenxa yomkhuhlane weCOVID-19.
Lokhu kulandela isinqumo sikaHulumende sokuthi imihloliso iyaqhubeka ngendlela eyayihlelwe ngayo. Inyathelo labeARTUZ leli lamukelwe ngemibono ehlukeneyo abanye ngenjabulo kodwa abanye bekhala ngokuthi lolu hlelo lungaba lendleko abangeyenelisiyo.
Unkosikazi Sukoluhle Ndlovu umgcinisihlalo weARTUZ, esigabeni seMatabeleland North njalo engumqondisi wohlangothi lweARTUZ lwemfundo zebulenjini, uthi isikolo lesi sesilabantu abanengi abaveze ukusijabulela eZimbabwe jikelele.
“Ngizathanda ukukhuluma ngesikolo seArtuz online classes amaclass akhona kulograde 7, O level le A level. Isikolo lesi sesibize abantwana abanengi jikelele iZimbabwe yonke and kukhanya abantu abanengi bayathanda ukungena ngoba sekuze kwavulwa amaclasses amanengi. Njenge Union siyathanda ukukhuthaza abazali ukuthi bayenze abantwana bengene kuloluhlelo ngesikhathi sokuvalelwa ngecorona virus njalo abantwana befunde besezindlini bengahlali bengala lutho abalwenzayo ukwenzela ukuthi nxa izikolo zivulwa ingqondo zabo zilokhe zikhaliphile.”
Unkosikazi Sukoluhle Ndlovu uthi akulambandalo efunekayo ukuthi umtwana afakwe eqenjini lokufunda njalo ababalisi benza lumsebenzi mahala.
‘’Uhlelo lolu lwesikolo luqhutshwa ngendlela yewhatsapp kwalungiswa amaqembu lapho abafundi abaxhumana khona lababalisi babo ezifundweni ezehlukeneyo ezikagrade 7, form 4 lo upper 6. Inhlelo zethu njalo ngezamahala azibhadalelwa any mtwana nje loba nguphi engaphi uyakwanisa ukuthi afakwe eqenjini kungelambadalo ekhona ababalisi bethu bafundisa mahala ababhadalisi.”
Unkosazana Kelly Nyoni ngumfundi phansi kwaloluhlelo.
“Njengomtwana wesikolo ngibona engathi ukufunda ngeWhatsapp kungcono ngoba siyabe siqhubeka sisiya phambili ngezifundo zethu. Ngenxa yelockdown leyi sokuzamele sibesisenza khonokhu okukhona, imaths yona ayisoke ibe ifundeka kahle ngoba siyabe sifuna ukuthi kuyabe kwenziwe njani ukuthi inombolo ziphume ziyizo siyabe sifuna ukubona ama examples.”
Unkosikazi Sandra Siziba ongumzali olomtwana ofunda ugwalo lwesikhombisa ngomunye wabajabulela lolu hlelo.
“Ukuthi abantwana befunde online ngikubona kulinyathelo elihle kakhulu njengomzali olomtwana obhala ugrade 7 ngoba kunje abantwana khathesi sebelakho ukuthi bebebusy ngalokhu lalokhuyana. Yebo kambe kuyabe kwehlukile kulokuthi bebe befundiswa nguteacher bemkhangele kodwa ngibona engani lokhe kulosizo sibili khathesi lanxa besiyabhala ama exams abo ngibona bazabe bengani baready ukuthi babhale ngoba asikwazi ukuthi isikhathi selockdown asikwazi ukuthi siyaba side okunganani, kwezinye indawo sesizwa kuthiwa yi6 months so thina siyakwamukela ukuthi abantwana bafunde online.”
Unkosikazi Joyline Masuku ngomunye wabazali abalujabulelayo loluhlelo kodwa ekhala ngendleko.
“Uhlelo lolu siyalubona sibili kodwa udumo lusekuthini ayisibo bonke abantwana abazakwanisa ukuthi bathole lama lessons atholakala online ngoba ayisibo bonke abadala abalabantwana abayenelisayo ukuthi babathengele idata.Idata ivele iyadula babanye kunjenje basemakhaya emakhaya abadala vele balabodorindori abala maphone akwanisa ukuthi athole leyomlayezo kuzatsho ukuthi abasetown lalabo ablabazali abenelisa ukuthi bathole lawo madata bangene online bathole lawo malesson yibo abazathola usizo.”
Obona ngokuqhutshwa kwenhlelo zemfundo koBulawayo uNkosikazi Olicah Kaira wenqabe ukuphendula imbuzo yeStudio 7 mayelana lamanyathelo athathwa nguhulumende emizameni yokuthi izifundo ziqhubeke laloba izikolo zivaliwe.
Ngakwelinye icele uhulumende useqale uhlelo lokuqhuba izifundo ebulenjini, emsakazweni yewayilesi kanye lakumabonakude.
Umbiko owethulwe ngumphathintambo wezemfundo yePrimary leSecondary, umnumzana Cain Mathema uthi uhlangothi olwe Curriculumn Development and Technical Services ludinga ababalisi abalezifundo zethemu lesibili esezilungile abanga zifaka kuma-audio lama video, ukuthi zihlolwe andubana zifakwe emoyeni. Lokhu kugcizelelwe ngunobhala jikelele wogatsha lwezemfundo unkosikazi Tumisang Thabela okhulume lephephandaba leDaily News lapha aveze ukuthi lezi zifundo zizalethwa ngababalisi ebulenjini ethi kodwa basalulolonga loluhlelo. Akavezanga ukuthi abalalisi bazaholiswa na phansi kwaloluhlelo.
Your browser doesn’t support HTML5
Udaba lwezifundo zebulenjini silophiwa nguBathabile Masuku