Inhlanganiso zaMakhosikazi adabuka eZimbabwe asehlala kweleBhilithane abazibiza ngegama lokuthi Mthwakazi Queens-UK bemanyene labelinye njalo iqembu elizibiza, 'Kuwe Babakazi' babelomkhosi wokubuthanisa imali edolobheni leCoventry emcimbini wabo weminyaka yonke weKhisimusi. Imali etholakeleyokulumkhosi bathi ngeyokusiza ogogo labokhulu abagcinwa ezibhedlela labanye abaswelayo ukuthi babe labo leKhismusi elitshukela njalo besidla izibiliboco.
Babuye ngobunengi abantu emkhosini weKhisimusi lo, bezokudla begida ngasikhathi sinye bebuthanisa imali yokuphathisa abaswelayo ekhaya.
Abeqembu ele "Mthwakazi Queens UK" lele "Kuwe Babakazi" abayibo abaqoqe umcimbi lo banhlangana enkundleni yokuzilibazisa lokuxhumana eyebulenjini eyeFacebook ngenjongo yokuhlanganela bephathisana ebunzimeni abahlangana labo njengabesifazana.
UNkosazana Sazzy Mathobela yena ukhokhela amakhosikazi eMthwakazi Queens-UK ujabule kakhulu ngalumcimbi.
UNkosazana Sazzy Mathobela okhokhela iqembu leMthwakazi Queens-UK
"Sijabula nje sihlangene siyisizwe sikaMthwakazi, sizama ukubana siqoqe izimali kanye lokunye ukubana sincedise isizwe sakwethu seMthwakazi. Lo ngumdlalo esihlala siwenza minyaka yonke nje ngeskhathi sikaLwezi kumbe ngo December, ukubana sincedise ngasemva ekhaya. Kube yimpumelelo enhle kakhulu njalo abantu baxasile kakhulu, siyabonga kulokho. Sizakhangelela ukubana siqalise imisebenzi yethu ka2020 ngesupport yenu enkulu kangaka, siyabonga."
UNkosazana Sisasenkosi Mkandla ukhokhela iKuwe Babakazi uthi uziqhenya ngokubambana kwabomama bakoBulawayo abahlala eNglandi.
"It's not just iChristmas Party but yikuhlangana sibambana singabantu bakoMthwakazi, empowering each other, having fun together. Kunzima elizweni leli and once in a while you need to get together and enjoy yourselves and part of it yikuthi sisebenzela ama communities back home and we just want to collaborate and see what we can do for everyone back home."
Umcimbi lo ubumnandi ngempela njalo abesilisa abakade bekhona abafana lo Mnunzana Nixon Nkomo uyafakaza.
"Ngibize wonke uMthwakazi ukuthi uze lapha sisupporte omama ngoba into abayenzayo hayi inhle kakhulu and into yabo iyabukeka and ithuthukisa isizwe sakoMthwakazi. Mina engikuthakazelelakakhul ngibone ukubambana kwabantu abangomama okwenza kwenze ukuthi bethuthukiswe, actually kuyangenza lamiziqhenye ukuthi ngivela koBulawayo, ngendlela ababambene ngayo."
UMnu Sipho Khumalo ugide waze waginqa okwamagama laye ejabuliswa yimisebenzi emihle eyenziwa ngomama laba.
"Into yabomama leyi iyasijabulisa kakhulu ukuthi omama bayahlanganisa ubuntu bethu lesintu sethu ukuthi abantu kabahlangane. Abantu abazithokozise abantu abakhumbule amasiko lokuthi abantu bahlangane bakhumbulane abantu bazane. Into eqakathekileyo kakhulu izihlobo zethu ziyaludinga kakhulu usizo lwethu especially emakhaya. So nxa besenza iCharity engcedisayo ekhaya yinto emangalisayo kakhulu engathi bangaqhubekela phambili ngomsebenzi omuhle kakhulu."
Kutshakalwe kwajatshulwa emcimbini lo, kwadliwa, kwagidwa, phezu kwalokho kwabuthaniswa imali yokusiza abaswelayo ekhaya.
Iyancomeka imsebenzi yamakhosikazi la. Njengoba iKhisimusi kuyisikhathi sokunikana izipho lokuphathisana, kubakuhle ke ukuthi abaswelayo basizwe labo babeleKhisimusi emnandi.
Your browser doesn’t support HTML5
Udaba lomcimbi wabeMthwakazi Queens siluphiwa nguEzra Tshisa Sibanda