Intsha yeMandebeleni ikakhulu eyesiKhalangeni ehlala kweleSouth Africa isisole kakhulu amazwi kamongameli Mugabe awethule kwabezindaba izolo esithi abesiKhalangeni kabafundanga njalo yibo abadala amacala eGoli. Abatsha laba bathi okwenza babe kweleSouth Africa kungenxa yokwehluleka ukubusa kukamongameli Mugabe njalo bathi bazathumela uhulumende weZimbabwe incwadi yokusola lamazwi.
Linkulumo eyethulwe ngumongameli Robert Mugabe ekhuluma labezindaba eHarare ngoLwesithathu ngemva komhlangano weSADC izolo, isitshiye intsha yeMandebeleni ekakhulu abesiKhalangeni bezonde baganunwabu.
Umnumnzana Desire Dube, Odabuka koTsuku ePlumtree phansi kwenduna uMadlambuzi uthi kuyabamangalisa ukuthi umuntu owathola umnotho umi mpo, wawuguguda waze walala phansi ngogedla, lamhlanje nguye osebatshela ukuthi abafundanga, bayizigebenga njalo kakusihulumende obenze beyakweleSouth Africa.
UDube uthi okubazwisa ubuhlungu yikuthi sebeze bathathelwa ngitsho lemisebenzi yokuthanyela endaweni ezigoqela emahofisi emingceleni Plumtree leyo misebenzi yaphiwa abantu abangazi ngitsho lo ‘A’ wesiKhalanga.
Umnumnza Never Sibanda, ongumgcinisihlalo wabatsha ebandleni leZapu kweleSouth Africa uthi basele bebambe owangaphansi ngamazwi kamongameli.
Kodwa uSibanda uthi labo abamazi kahle umongameli Mugabe ngalokhu akwenza kweleMandebeleni ngesikhathi seGukurahundi, kakufanelanga bethuswe yilokhu akutshiloyo.
Umnumnzana Mbuyiseni Moyo, odabuka koNdolwane ePlumtree uthi abakubongayo nje yikuthi umongameli Mugabe useze waphumela obala ngalokho yena lebandla lakhe leZanu pf abakucabangayo ngamaKhalanga lntsha jikelele yeMandebeleni.
UMoyo uthi balungiselela ukubhalela uhulumende weZimbabwe incwadi bekhonona ngale inkulumo eyethulwe ngumongameli Mugabe.
UBenedict Nhlapho usipha loludaba eseJohannesburg kweleSouth Africa.
Your browser doesn’t support HTML5
Udaba Silethulelwa nguBennedict Nhlapho
Kunjalo nje, zulu weZimbabwe umanyene ekusoleni amazwi kaMongameli Mugabe awokuthi abantu besikalangeni kabafundanga njalo baya eGoli ukuyayenza imisebenzi efana lobusela leminye engalunganga.
Amabandla ezombusazwe lawo atshengise ukungathakazeleli amazwi la esithi uMugabe kumele axolise. Ibandla leMDC-T lithi uMongameli Mugabe usekhwezele udubo lokuhlaselwa kwabokuza kwele South Africa ngamazwi akhe.
Unobhala jikelele walelibandla, uMnu. Douglas Mwonzora uthi ibandla lakhe lima labesikhalanga abathukiweyo ngoba lona lifuna ukumanyana kwendimi zonke zelizwe. Kuthi icele leMDC eliokhokhelwa nguMnu. Welshman Ncube lona lithi kuyamangalisa ukuthi phakathi kwabantu abedlula izigidi ezintathu abavela eZimbabwe uMugabe engakhetha abesikhalanga kuphela.
Lelibandla lithi uMugabe uyakhohla ukuthi isisusa sokuyaphephela kwele South Africa nguye. Ukuhlaziya loludaba uChris Gande weStudio Seven uxoxe lesiphathamandla sebandla le Zanu PF, uMnu. Morris Ngwenya endawonye lonobhala jikelele webandla leMDC ekhokhelwa nguMnu. Welshman Ncube, uMnu. Mosese Mzila Ndlovu ongowesikalanga, osungula lingxoxo.
Your browser doesn’t support HTML5
Ingxoxo loMnu. Morris Ngwenya loMnu. Moses Mzila Ndlovu